નવી દિલ્હી:ભારતીય રાજનીતિ અને વહીવટી ઇતિહાસમાં આજે એક નવો અધ્યાય લખાયો છે. વડાપ્રધાન નરેન્દ્રભાઈ મોદીએ તેમના નવા અત્યાધુનિક કાર્યાલય સંકુલ *'સેવા તીર્થ'*નું ઉદ્ઘાટન કર્યું. આ પ્રસંગે ૧.૪ અબજ ભારતીયોને સંબોધતા પીએમ મોદીએ એક મોટી વાત કહી. તેમણે જણાવ્યું કે, અત્યાર સુધી જે સાઉથ બ્લોક અને નોર્થ બ્લોકથી દેશ ચાલતો હતો, તે વાસ્તવમાં બ્રિટિશ સામ્રાજ્ય દ્વારા ભારતને ગુલામીની સાંકળોમાં બાંધવા માટે બનાવાયા હતા. હવે ભારત તેના પોતાના 'સેવા તીર્થ'થી વિકાસની નવી ઊંચાઈઓ સર કરશે.
 પીએમ મોદીએ ગણેશ પૂજા સાથે નવા સંકુલમાં પ્રવેશ કર્યો હતો. આ સંકુલમાં માત્ર પીએમઓ જ નહીં, પણ રાષ્ટ્રીય સુરક્ષા પરિષદ અને કેબિનેટ સચિવાલય પણ કાર્યરત થશે. આ ઉપરાંત 'કર્તવ્ય ભવન ૧ અને ૨' માં નાણાં, સંરક્ષણ અને કૃષિ જેવા ૧૦થી વધુ મહત્વના મંત્રાલયોને સ્થાન અપાયું છે. પીએમએ જણાવ્યું કે આનાથી વિભાગો વચ્ચે સંકલન વધશે અને સરકારી ખર્ચમાં પણ મોટો ઘટાડો થશે.
નવી ઓફિસમાં પ્રથમ દિવસે જ લીધેલા ૪ મોટા નિર્ણયો: નવી ઓફિસમાં કાર્યભાર સંભાળતાની સાથે જ પીએમ મોદીએ જે ફાઇલો પર હસ્તાક્ષર કર્યા, તે તેમની 'સેવા પરમો ધર્મ'ની ભાવનાને દર્શાવે છે:
૧. પીએમ રાહત યોજના: માર્ગ અકસ્માતમાં ઘાયલ નાગરિકોને ₹૧.૫ લાખ સુધીની કેશલેસ સારવાર મળશે. હવે પૈસાના અભાવે કોઈનો જીવ નહીં જાય.
૨. લખપતિ દીદીનો નવો સંકલ્પ: ૩ કરોડ લખપતિ દીદી બનાવવાનું લક્ષ્ય સમય પહેલા પૂર્ણ થતા, હવે માર્ચ ૨૦૨૯ સુધીમાં ૬ કરોડ મહિલાઓને લખપતિ બનાવવાનો નિર્ધાર કર્યો છે.
૩. કૃષિ ફંડ બમણું: ખેડૂતોની સુવિધા માટે એગ્રીકલ્ચર ઇન્ફ્રાસ્ટ્રક્ચર ફંડને ₹૧ લાખ કરોડથી વધારીને ₹૨ લાખ કરોડ કરવામાં આવ્યું છે.
૪. સ્ટાર્ટઅપ ઇન્ડિયા ૨.૦: નવા યુગના સ્ટાર્ટઅપ્સ માટે ₹૧૦,૦૦૦ કરોડના નવા ફંડને મંજૂરી આપી છે, જે ડીપ ટેક અને નવી ટેકનોલોજી પર કામ કરતા યુવાનોને મદદ કરશે.
વડાપ્રધાન મોદીએ સ્પષ્ટ કર્યું કે ૨૦૧૪થી તેમની સરકારનો ધ્યેય વસાહતી માનસિકતાના પ્રતીકોને દૂર કરી એક આધુનિક અને સંવેદનશીલ શાસન પ્રણાલી વિકસાવવાનો છે. 'સેવા તીર્થ' એ માત્ર ઇમારત નથી, પણ વિકસિત ભારતના સંકલ્પની સિદ્ધિ તરફનું પ્રથમ ડગલું છે