વારાણસી: ધર્મ અને આધ્યાત્મની નગરી કાશી હવે ટૂંક સમયમાં ક્રિકેટના મેદાન પર પણ પોતાની સાંસ્કૃતિક ઓળખનો ડંકો વગાડશે.વારાણસીના ગંજરીમાં નિર્માણ પામી રહેલા 'વારાણસી ઇન્ટરનેશનલ ક્રિકેટ સ્ટેડિયમ'નો નવો વીડિયો સોશિયલ મીડિયા પર વાયુવેગે વાયરલ થઈ રહ્યો છે. આ સ્ટેડિયમની સૌથી મોટી ખાસિયત એ છે કે તેની સંપૂર્ણ ડિઝાઇન ભગવાન શિવના પ્રતીકો પર આધારિત છે, જે તેને વિશ્વના અન્ય તમામ સ્ટેડિયમોથી અલગ પાડે છે.
 વાયરલ વીડિયોમાં સ્ટેડિયમની ભવ્યતા સ્પષ્ટપણે દેખાય છે. સ્ટેડિયમમાં લગાવવામાં આવેલી ફ્લડલાઇટ્સનો આકાર ભગવાન શિવના ત્રિશૂળ જેવો છે, જે રાત્રિના સમયે આકાશમાં અત્યંત મનમોહક દ્રશ્ય સર્જશે. આ ઉપરાંત:
પેવેલિયન: સ્ટેડિયમનું મુખ્ય પેવેલિયન ડમરુ આકારનું બનાવવામાં આવ્યું છે.
છત: સ્ટેડિયમની છતનો આકાર ભગવાન શિવના મસ્તક પર બિરાજતા અર્ધચંદ્ર જેવો રાખવામાં આવ્યો છે.
બેઠક વ્યવસ્થા: પ્રેક્ષકો માટેની બેઠક વ્યવસ્થા વારાણસીના વિશ્વપ્રસિદ્ધ ગંગા ઘાટની સીડીઓ જેવી તૈયાર કરવામાં આવી છે.
૭૫% કામ પૂર્ણ, એપ્રિલ ૨૦૨૬માં થશે ધમાકો: બનારસના ગંજરી વિસ્તારમાં બની રહેલા આ સ્ટેડિયમનું કામ ૭૫% જેટલું પૂર્ણ થઈ ગયું છે. સત્તાવાર માહિતી મુજબ, એપ્રિલ ૨૦૨૬ સુધીમાં આ સ્ટેડિયમ આંતરરાષ્ટ્રીય મેચો માટે સજ્જ થઈ જશે. આ સ્ટેડિયમ માત્ર રમતનું મેદાન નહીં, પણ કાશીના આધ્યાત્મિક વારસાનું પ્રતીક બની રહેશે.
 સ્ટેડિયમનો વીડિયો જોયા પછી ક્રિકેટ પ્રેમીઓ અને શિવભક્તોમાં ભારે ઉત્સાહ જોવા મળી રહ્યો છે. એક યુઝરે લખ્યું કે, "આ પૃથ્વી પરના સ્વર્ગ જેવું છે", જ્યારે અન્ય એક યુઝરે કમેન્ટ કરી કે, "આપણા સનાતની વારસાને રમતગમત સાથે જોડવાનો આ શ્રેષ્ઠ પ્રયાસ છે." પીએમ મોદીના સંસદીય ક્ષેત્રમાં બની રહેલું આ સ્ટેડિયમ ભારતની આધ્યાત્મિક રાજધાની માટે ગૌરવ સમાન છે. જ્યારે આ સ્ટેડિયમમાં પહેલી આંતરરાષ્ટ્રીય મેચ રમાશે, ત્યારે સમગ્ર વિશ્વ કાશીની ભવ્યતા અને શિવભક્તિનો સાક્ષી બનશે