જયપુર: રાજસ્થાનની ગુલાબી નગરી જયપુર તેના કિલ્લાઓ માટે તો જાણીતી છે જ, પણ અહીં એક એવું મંદિર આવેલું છે જેના નામ માત્રથી લોકોના રુંવાડા ઉભા થઈ જાય છે. જયપુરના ગાઢ જંગલોની વચ્ચે આવેલું 'ભૂતેશ્વર મહાદેવ મંદિર' આ દિવસોમાં સોશિયલ મીડિયા અને શ્રદ્ધાળુઓમાં ચર્ચાનો વિષય બન્યું છે. ૨,૦૦૦ વર્ષ જૂના આ મંદિર સાથે એવી રહસ્યમય વાર્તાઓ જોડાયેલી છે કે લોકો અહીં એકલા જવાનું ટાળે છે.
સ્થાનિક લોકવાયકા મુજબ, આ મંદિરનું નિર્માણ કોઈ રાજા કે શિલ્પકારે નથી કર્યું, પરંતુ અલૌકિક શક્તિઓ એટલે કે ભૂતોએ માત્ર એક જ રાતમાં કર્યું હતું. આ જ કારણ છે કે તેનું નામ 'ભૂતેશ્વર' પડ્યું છે. ભક્તોનું માનવું છે કે આજે પણ અહીં કોઈ અદ્રશ્ય શક્તિનો વાસ છે. રવિવાર, ૧૫ ફેબ્રુઆરીએ આવતી મહાશિવરાત્રી પૂર્વે આ મંદિરનું રહસ્ય ફરી એકવાર ઘેરાયું છે.
 મંદિર વિશે સૌથી ડરામણી માન્યતા એ છે કે જે કોઈ વ્યક્તિ રાત્રિના સમયે અહીં રોકાવાની હિંમત કરે છે, તે સવારે સુરક્ષિત હાલતમાં જોવા મળતો નથી. ગ્રામજનોના જણાવ્યા અનુસાર, સૂર્યાસ્ત પછી આ વિસ્તારમાં વિચિત્ર અવાજો સંભળાય છે. આ ડરને કારણે ભક્તો હંમેશા જૂથમાં જ દર્શન કરવા જાય છે.
 વર્ષો સુધી આ મંદિર જંગલની ઝાડીઓમાં છુપાયેલું રહ્યું હતું. કહેવાય છે કે એક પહોંચેલા સંતે આ મંદિરની શોધ કરી અને અહીં વર્ષો સુધી તપસ્યા કરી. એક રાત્રે શિવની આરાધના કરતી વખતે જ સંતે ત્યાં પ્રાણ ત્યાગ્યા હતા, ત્યારથી આ સ્થાન વધુ જાગૃત અને શક્તિશાળી હોવાનું માનવામાં આવે છે. ભલે વિજ્ઞાન આ વાતોને ન માને, પણ શ્રદ્ધાળુઓ માટે ભૂતેશ્વર મહાદેવ શ્રદ્ધા અને આશ્ચર્યનો સંગમ છે. મહાશિવરાત્રી અને શ્રાવણ માસમાં અહીં હજારોની સંખ્યામાં ભક્તો 'હર હર મહાદેવ'ના નાદ સાથે ઉમટી પડે છે.