રાજકોટ: છેલ્લા કેટલાક દિવસોથી કિંમતી ધાતુઓના ભાવમાં ચાલી રહેલી નરમાશ બાદ આજે ભારતીય સર્રાફા બજારમાં ફરી એકવાર તેજીનો વંટોળ જોવા મળ્યો છે. આજે શુક્રવારે ચાંદીના ભાવમાં ₹૧૨,૦૦૦થી વધુનો તોતિંગ ઉછાળો નોંધાયો છે, જ્યારે સોનાના ભાવમાં પણ મોટી વૃદ્ધિ જોવા મળી છે. આ ઉછાળાને પગલે રોકાણકારોમાં ખુશીનો માહોલ છે, પરંતુ લગ્નસરા માટે ઘરેણાં ખરીદનારા સામાન્ય ગ્રાહકોના ખિસ્સા પર મોટો બોજ પડવાની શક્યતા છે.
મલ્ટી કોમોડિટી એક્સચેન્જ (MCX) પર આજે ચાંદીમાં જોરદાર લેવાલી જોવા મળી હતી. માર્ચ ૨૦૨૬ના વાયદા બજારમાં ચાંદી ₹૮,૬૯૧ વધીને ₹૨,૪૫,૧૨૬ પ્રતિ કિલો પર ટ્રેડ કરતી જોવા મળી હતી. દિવસ દરમિયાન ચાંદીએ ₹૨,૪૮,૭૮૬ની સર્વોચ્ચ સપાટીને સ્પર્શી હતી. જો ગઈકાલના બંધ ભાવ અને આજના હાઈ લેવલની સરખામણી કરીએ તો ચાંદીમાં ₹૧૨,૩૫૧નો તોતિંગ વધારો નોંધાયો છે.
 ચાંદીની પાછળ પાછળ સોનાના ભાવમાં પણ ચમક જોવા મળી છે. MCX પર સોનું ₹૧,૩૬૯ વધીને ₹૧,૫૪,૨૦૫ પ્રતિ ૧૦ ગ્રામ પર પહોંચી ગયું છે. કારોબારમાં સોનાએ ₹૧,૫૪,૮૩૭ની ઊંચી સપાટી બનાવી હતી. વૈશ્વિક બજારમાં નબળો પડતો ડોલર અને સુરક્ષિત રોકાણ તરીકે સોનામાં વધતી માંગ આ તેજી માટે જવાબદાર હોવાનું નિષ્ણાતો માની રહ્યા છે.
જ્વેલરી બ્રાન્ડ્સના તાજા ભાવ (૨૨ કેરેટ સોનું): જોકે, ભૌતિક સોનાના ભાવમાં કેટલીક જગ્યાએ નજીવો ઘટાડો જોવા મળ્યો છે, જે ગ્રાહકો માટે આંશિક રાહત સમાન છે:
જ્વેલરનું નામ ૨૨ કેરેટ સોનું (₹/૧૦ ગ્રામ)
કન્યાણ જ્વેલર્સ ₹૧,૪૨,૮૦૦
જૉયલુક્કાસ ₹૧,૪૨,૮૦૦
તનિષ્ક ₹૧,૪૫,૧૫૦
 બજારના જાણકારોના મતે, આર્થિક અનિશ્ચિતતા અને ઇન્ડસ્ટ્રિયલ માંગને કારણે ચાંદીમાં આ પ્રકારનો ઉછાળો જોવા મળી રહ્યો છે. જો આગામી દિવસોમાં પણ વૈશ્વિક સંકેતો પોઝિટિવ રહેશે, તો સોના-ચાંદીના ભાવ હજુ પણ નવા રેકોર્ડ બનાવી શકે છે. ગ્રાહકોએ ખરીદી કરતા પહેલા મેકિંગ ચાર્જ અને સ્થાનિક ટેક્સની તપાસ કરી લેવી જોઈએ.