લંડન: બ્રિટિશ રાજવી પરિવારમાં અત્યારે બધું જ બરાબર ચાલી રહ્યું હોય તેવું લાગતું નથી. કુખ્યાત જાતીય ગુનેગાર જેફરી એપ્સટાઇન સાથે જોડાયેલા નવા દસ્તાવેજો (Epstein Files) બહાર આવ્યા બાદ પ્રિન્સ ઓફ વેલ્સ વિલિયમ અને તેમની પત્ની કેટ મિડલટન, પ્રિન્સ એન્ડ્રુની દીકરીઓ બીટ્રિસ અને યુજેનીથી અંતર જાળવી રહ્યા છે. રાજવી પરિવારના આંતરિક સૂત્રોના જણાવ્યા મુજબ, વિલિયમ અને કેટ આ બંને બહેનોના ભવિષ્ય અંગે ખૂબ જ કડક વલણ અપનાવી શકે છે.

એપ્સટાઇન ફાઇલ્સ અને રાજકુમારીઓની ભૂમિકા

તાજેતરના દસ્તાવેજોમાં ચોંકાવનારો ખુલાસો થયો છે કે પ્રિન્સેસ બીટ્રિસ અને યુજેની તેમના માતા-પિતાના એપ્સટાઇન સાથેના વ્યવહારોથી અજાણ નહોતી. ૨૦૧૫ના એક ઇમેઇલમાં એપ્સટાઇને દાવો કર્યો હતો કે બીટ્રિસ તેને 'પસંદ' કરે છે. એટલું જ નહીં, જ્યારે ૨૦૧૧માં તેમની માતા ફર્ગી (Fergie) એ એપ્સટાઇનને પિડોફાઇલ કહ્યા હતા, ત્યારે બીટ્રિસે જ તેમને સલાહ આપી હતી કે એપ્સટાઇનને કેવી રીતે શાંત કરવા. આ ખુલાસાઓએ વિલિયમ અને કેટને વધુ સાવધ કરી દીધા છે.

કેમ કેટ મિડલટન રાખી રહી છે અંતર?

રાજવી પરિવારના સૂત્રો કહે છે કે કેટ અને આ બંને બહેનો વચ્ચે ક્યારેય ખાસ મિત્રતા રહી નથી. ખાસ કરીને પ્રિન્સેસ યુજેની, પ્રિન્સ હેરી અને મેઘન માર્કલની ખૂબ નજીક હોવાથી કેટ તેના પ્રત્યે હંમેશા 'સાવચેત' રહે છે. ૨૦૧૬માં બકિંગહામ પેલેસની એક પાર્ટીમાં પણ આ બહેનો કેટને તીખી નજરે જોતી હોવાની તસવીરો વાયરલ થઈ હતી. હવે જ્યારે વિલિયમ ભવિષ્યના રાજા બનવા તરફ જોઈ રહ્યા છે, ત્યારે તેઓ આવા વિવાદિત સભ્યોને રાજવી ફરજોથી દૂર રાખવા માંગે છે.

વિલિયમની ‘અવોઇડન્સ મિકેનિઝમ’: નજર પણ નથી મિલાવતા

તાજેતરમાં નાતાલ દરમિયાન જ્યારે રાજવી પરિવાર સેન્ડ્રિંગહામ ખાતે એકઠો થયો હતો, ત્યારે એક વીડિયોમાં જોવા મળ્યું હતું કે વિલિયમ જાણી જોઈને પ્રિન્સેસ યુજેની સાથે વાત કરવાનું ટાળી રહ્યા હતા. જ્યારે યુજેની તેમની બાજુમાં આવી, ત્યારે વિલિયમે તેની સાથે નજર મિલાવવાને બદલે પોતાના સ્કાફને ઠીક કરવાનું શરૂ કરી દીધું હતું. બોડી લેંગ્વેજ એક્સપર્ટ આને વિલિયમની 'અવોઇડન્સ ટેક્ટિક' (ટાળવાની પદ્ધતિ) ગણાવે છે.

શું બીટ્રિસ અને યુજેનીનું રાજવી ભવિષ્ય જોખમમાં છે?

એક્સપર્ટ્સનું માનવું છે કે પ્રિન્સ એન્ડ્રુના કૌભાંડોની અસર હવે તેમની દીકરીઓ પર પડી રહી છે. પ્રિન્સ વિલિયમ અત્યારે એપ્સટાઇન ફાઇલ્સના દરેક પેજ પર બારીકાઈથી નજર રાખી રહ્યા છે. જો તેમાં આ બહેનોની વધુ સંડોવણી સાબિત થશે, તો વિલિયમ તેમને 'વર્કિંગ રોયલ્સ' (રાજવી કામગીરી કરતા સભ્યો) માંથી કાયમ માટે બાકાત કરી શકે છે. હાલમાં આ બંને રાજકુમારીઓ પોતે શરમ અને ક્ષોભ અનુભવી રહી હોવાનું મનાય છે.