મ્યુનિખ: જર્મનીના મ્યુનિખ શહેરની ગલીઓ આજે ઇરાનની ઇસ્લામિક રિપબ્લિક સરકાર વિરુદ્ધના નારાઓથી ધ્રૂજી ઉઠી હતી. પોલીસના અંદાજ મુજબ, શનિવારે અંદાજે 2,00,000 જેટલા પ્રદર્શનકારીઓ રસ્તા પર ઉતરી આવ્યા હતા, જે યુરોપમાં ઇરાની શાસન વિરુદ્ધ થયેલું અત્યાર સુધીનું સૌથી મોટું વિરોધ પ્રદર્શન છે. આ પ્રદર્શનમાં લોકોએ 1979ની ક્રાંતિ પહેલાના ઇરાની રાષ્ટ્રધ્વજ (સિંહ અને સૂર્યવાળા) લહેરાવીને પરિવર્તનની માંગ કરી હતી.

ક્રાઉન પ્રિન્સ રઝા પહલવીની આગેવાની

આ ઐતિહાસિક વિરોધ પ્રદર્શનનું નેતૃત્વ ઇરાનના અંતિમ શાહના પુત્ર અને દેશવટામાં રહેલા ક્રાઉન પ્રિન્સ રઝા પહલવીએ કર્યું હતું. મ્યુનિખ સિક્યુરિટી કોન્ફરન્સમાં વિશ્વના નેતાઓ એકઠા થયા છે ત્યારે પહલવીએ સ્ટેજ પરથી ગર્જના કરી હતી કે, "આ ઘડી અત્યંત જોખમી છે. શું વિશ્વ ઇરાનના લોકોની પડખે ઊભું રહેશે?" તેમણે અમેરિકન પ્રમુખ ડોનાલ્ડ ટ્રમ્પને ઇરાની જનતાની મુક્તિ માટે મદદ કરવાની અપીલ કરી હતી.

લોહિયાળ સંઘર્ષ અને આંતરરાષ્ટ્રીય દબાણ

ઇરાનમાં ડિસેમ્બરના અંતથી શરૂ થયેલા સરકાર વિરોધી દેખાવોમાં અત્યાર સુધીમાં ઓછામાં ઓછા 7,005 લોકો માર્યા ગયા હોવાનો અહેવાલ હ્યુમન રાઇટ્સ એક્ટિવિસ્ટ ન્યૂઝ એજન્સીએ આપ્યો છે. પહલવીએ ચેતવણી આપી હતી કે જો લોકશાહી દેશો મૂકપ્રેક્ષક બની રહેશે, તો નિર્દોષ લોકોના મોતના આંકડા હજુ વધશે. તેમણે કહ્યું કે શાસન ટકી રહેવું એ દુનિયાના દરેક અત્યાચારી માટે સંકેત છે કે 'વધુ લોકોને મારો અને સત્તા પર ટકી રહો'.

વિશ્વના અન્ય શહેરોમાં પણ આંદોલનની જ્વાળા

મ્યુનિખ ઉપરાંત, લોસ એન્જલસ અને ટોરોન્ટો જેવા શહેરોમાં પણ શનિવારે વિશાળ રેલીઓ કાઢવામાં આવી હતી, જ્યાં ઇરાની સમુદાયની મોટી વસ્તી વસે છે. આ પ્રદર્શનો દ્વારા તેહરાન પર આંતરરાષ્ટ્રીય દબાણ વધારવાનો પ્રયાસ કરવામાં આવી રહ્યો છે. પ્રદર્શનકારીઓએ ઢોલ વગાડી અને સૂત્રોચ્ચાર કરીને માંગ કરી હતી કે હવે સમય આવી ગયો છે કે ઇરાનમાં ઇસ્લામિક શાસનનો અંત આવે અને લોકશાહીની સ્થાપના થાય.