મુંબઈ : મહારાષ્ટ્રના રાજકારણમાં છેલ્લા કેટલાક સમયથી ચાલી રહેલી અટકળોનો અંત આવ્યો છે. રાષ્ટ્રવાદી કોંગ્રેસ પાર્ટી (NCP) ના કાર્યકારી પ્રમુખ પ્રફુલ્લ પટેલે શનિવારે સ્પષ્ટ કર્યું છે કે, અજિત પવારના આકસ્મિક અવસાન બાદ હવે તેમના પત્ની અને મહારાષ્ટ્રના વર્તમાન નાયબ મુખ્યમંત્રી સુનેત્રા પવાર પક્ષનું નેતૃત્વ સંભાળશે. સુનેત્રા પવાર NCPના 26 વર્ષના ઈતિહાસમાં પ્રથમ મહિલા રાષ્ટ્રીય અધ્યક્ષ બનીને નવો ઈતિહાસ રચશે.

સર્વસંમતિથી લેવાયો નિર્ણય

પ્રફુલ્લ પટેલે મીડિયા સાથેની વાતચીતમાં જણાવ્યું હતું કે, "પક્ષના રાષ્ટ્રીય અધ્યક્ષ પદ માટે સુનેત્રા પવાર જ એકમાત્ર મજબૂત ઉમેદવાર છે અને આ બાબતે પક્ષમાં કોઈ મતભેદ નથી. તેઓ હાલ સરકારમાં નાયબ મુખ્યમંત્રી પદની જવાબદારી નિભાવી રહ્યા છે અને હવે સંગઠનનું નેતૃત્વ પણ કરશે." આગામી બે અઠવાડિયામાં સત્તાવાર રીતે તેમની વરણી કરવામાં આવશે. આ સાથે જ શરદ પવાર દ્વારા સ્થાપિત આ પાર્ટીમાં હવે સુનેત્રા પવારનો યુગ શરૂ થશે.

અજિત પવારના અવસાનના 13 દિવસ બાદ પદભાર સંભાળ્યો

ઉલ્લેખનીય છે કે, 28 જાન્યુઆરીએ પુણેના બારામતી પાસે વિમાન અકસ્માતમાં અજિત પવારનું નિધન થયું હતું. આ દુઃખદ ઘટનાના 13 દિવસ બાદ સુનેત્રા પવારે મંગળવારે મુંબઈ સ્થિત રાજ્ય સચિવાલય (મંત્રાલય) માં નાયબ મુખ્યમંત્રી તરીકેનો ચાર્જ સંભાળ્યો હતો. પદભાર સંભાળતા પહેલા તેમણે પુત્ર પાર્થ પવાર સાથે સિદ્ધિવિનાયક મંદિર અને ચૈત્યભૂમિ ખાતે જઈને પ્રાર્થના કરી હતી. તેમને રમતગમત, લઘુમતી કલ્યાણ અને વક્ફ બોર્ડ જેવા મહત્વના વિભાગો સોંપવામાં આવ્યા છે.

પક્ષનું વિલીનીકરણ કે સંગઠન મજબૂતી?

NCPના બંને જૂથોના વિલીનીકરણ અંગે ચાલી રહેલી ચર્ચાઓ પર વિરામ મુકતા પ્રફુલ્લ પટેલે કહ્યું કે, અત્યારે અમારું પ્રાથમિક લક્ષ્ય NCP સંગઠનને મજબૂત બનાવવાનું છે. અગાઉ એવી અફવા હતી કે પ્રફુલ્લ પટેલ પોતે અધ્યક્ષ બનશે, પરંતુ તેમણે પોતે જ આ વાતને નકારી દીધી હતી. સુનેત્રા પવાર આગામી બજેટ સત્રમાં પણ સક્રિય ભૂમિકા ભજવશે અને 23 ફેબ્રુઆરીએ યોજાનારી બિઝનેસ એડવાઇઝરી કમિટીની બેઠકમાં ભાગ લેશે.