ડિબ્રુગઢ (આસામ): વડાપ્રધાન નરેન્દ્ર મોદીએ શનિવારે આસામના ડિબ્રુગઢ જિલ્લામાં ભારતની રક્ષણાત્મક તાકાતનો અદભૂત નજારો પેશ કર્યો છે. ચીન સરહદની અત્યંત નજીક, આસામના મોરન ખાતે ઉત્તર-પૂર્વના પ્રથમ 'હાઈવે ઇમરજન્સી રનવે' પર પીએમ મોદીએ પોતે વાયુસેનાના C-130J સુપર હર્ક્યુલસ વિમાનમાં લેન્ડિંગ કરીને આ પ્રોજેક્ટનું ઉદ્ઘાટન કર્યું હતું. આ સાથે જ પીએમ મોદી દેશના એવા પ્રથમ નેતા બન્યા છે જેમણે ઇમરજન્સી હાઈવે રનવે પર લેન્ડિંગ કર્યું હોય.
શક્તિપ્રદર્શન: આકાશમાં રાફેલ અને સુખોઈની ગર્જના
વડાપ્રધાનના વિમાનના સફળ લેન્ડિંગ બાદ મોરનનું આકાશ ભારતીય વાયુસેનાના શક્તિશાળી વિમાનોથી ગુંજી ઉઠ્યું હતું. રાફેલ, સુખોઈ Su-30MKI અને ટ્રાન્સપોર્ટ હેલિકોપ્ટરોએ ૨૦ મિનિટ સુધી અદભૂત એર-શો યોજીને સૌને મંત્રમુગ્ધ કરી દીધા હતા. આ ઇમરજન્સી લેન્ડિંગ ફેસિલિટી (ELF) ૪૦ ટન સુધીના ફાઈટર જેટ અને ૭૪ ટન સુધીના ભારે માલવાહક વિમાનોને હેન્ડલ કરવા સક્ષમ છે.
ચીન સરહદથી માત્ર ૩૦૦ કિમી દૂર બેકઅપ તૈયાર
આ રનવે વ્યૂહાત્મક રીતે અત્યંત મહત્વનો છે કારણ કે તે વાસ્તવિક નિયંત્રણ રેખા (LAC) થી માત્ર ૩૦૦ કિમી દૂર આવેલો છે. જો ક્યારેય યુદ્ધ જેવી સ્થિતિ સર્જાય અને મુખ્ય એરબેઝ (જેમ કે તેઝપુર કે ચાબુઆ) પર હુમલો થાય, તો આ ૪.૨ કિમી લાંબો હાઈવે રનવે ફાઈટર જેટ્સ માટે લાઈફલાઈન સમાન સાબિત થશે. ₹૧૦૦ કરોડના ખર્ચે બનેલો આ રનવે પૂર જેવી કુદરતી આફતો સમયે પણ ઝડપી રાહત કામગીરી માટે આશીર્વાદરૂપ બનશે.
ડ્રેગનને સ્પષ્ટ સંકેત
સંરક્ષણ વિશ્લેષકો માને છે કે પીએમ મોદીનું પોતે અહીં ઉતરાણ કરવું એ ચીન માટે એક મોટો સંદેશ છે. આ ઘટના સાબિત કરે છે કે ભારત હવે સરહદી વિસ્તારોમાં ઇન્ફ્રાસ્ટ્રક્ચર બાબતે કોઈ પણ પ્રકારની બાંધછોડ કરવા તૈયાર નથી. આસામ હવે માત્ર ભારતની સરહદ નથી, પણ ભારતની વ્યૂહાત્મક શક્તિનું કેન્દ્ર બની ગયું છે.
આ કાર્યક્રમમાં આસામના મુખ્યમંત્રી હિમંતા બિસ્વા શર્મા અને કેન્દ્રીય મંત્રી સર્બાનંદ સોનોવાલ સહિત વાયુસેનાના ઉચ્ચ અધિકારીઓ ઉપસ્થિત રહ્યા હતા. દેશભરમાં આવા ૨૮ ઇમરજન્સી રનવે બનાવવાની યોજનાના ભાગરૂપે આ પ્રોજેક્ટ પૂર્ણ કરવામાં આવ્યો છે.