ઢાકા: બાંગ્લાદેશમાં સત્તાપલટા અને ચૂંટણી બાદ હવે નવા રાજકીય સમીકરણો આકાર લઈ રહ્યા છે. બાંગ્લાદેશ નેશનાલિસ્ટ પાર્ટી (BNP) ના કદાવર નેતા તારિક રહેમાને પોતાની પ્રથમ સત્તાવાર પ્રેસ કોન્ફરન્સમાં ભારત અને અન્ય પડોશી દેશો સાથેના સંબંધો પર બાંગ્લાદેશનું વલણ સ્પષ્ટ કર્યું છે. ભારત સાથેના ભવિષ્યના સંબંધો અંગેના પ્રશ્નના જવાબમાં રહેમાને અત્યંત ગંભીરતાથી કહ્યું કે, "અમારા માટે બાંગ્લાદેશ અને તેના લોકોનું હિત સૌથી પહેલા છે. જે પણ નિર્ણય બાંગ્લાદેશના લોકો માટે શ્રેષ્ઠ હશે, તે જ અમારી વિદેશ નીતિનો આધાર બનશે."
ભારત-ચીન-પાકિસ્તાન વચ્ચે સંતુલનનો પડકાર
જ્યારે પત્રકારોએ તેમને પૂછ્યું કે તેઓ ભારત, ચીન અને પાકિસ્તાન જેવી પ્રાદેશિક સત્તાઓ વચ્ચે કેવી રીતે સંતુલન જાળવશે, ત્યારે રહેમાને ખૂબ જ સાવધ પ્રતિસાદ આપ્યો હતો. તેમણે આ મુદ્દે વધુ વિગતો આપવાનું ટાળ્યું હતું, પરંતુ એટલું જરૂર સ્વીકાર્યું હતું કે ચીન બાંગ્લાદેશના વિકાસ પ્રોજેક્ટ્સમાં મહત્વનું ભાગીદાર છે અને ભવિષ્યમાં આ સહયોગ વધુ મજબૂત બનશે તેવી આશા છે.
શેખ હસીનાના પ્રત્યાર્પણ પર મોટું નિવેદન
બાંગ્લાદેશમાં હાલમાં સૌથી ચર્ચિત મુદ્દો પૂર્વ વડાપ્રધાન શેખ હસીનાનું ભારતમાંથી પ્રત્યાર્પણ છે. આ અંગે જ્યારે રહેમાનને સવાલ કરવામાં આવ્યો કે શું તેમની સરકાર ભારત પાસે શેખ હસીનાની માંગણી કરશે? ત્યારે તેમણે ટૂંકો અને મક્કમ જવાબ આપતા કહ્યું, "આ બધું કાયદાકીય પ્રક્રિયા પર નિર્ભર રહેશે." આ નિવેદન દર્શાવે છે કે BNP આવનારા સમયમાં આ મુદ્દાને આંતરરાષ્ટ્રીય સ્તરે ઉઠાવી શકે છે.
સુશાસન અને આર્થિક સુધારા પર ભાર
રહેમાને સ્વીકાર્યું કે બાંગ્લાદેશ હાલમાં આર્થિક કટોકટી અને કાયદો-વ્યવસ્થાના કથળતા માળખા સામે ઝઝૂમી રહ્યું છે. તેમણે ખાતરી આપી કે BNPની પ્રાથમિકતા દેશમાં 'સુશાસન' સ્થાપવાની છે. સરકારી સંસ્થાઓને મજબૂત કરવી અને અસ્થિર અર્થતંત્રને પાટા પર લાવવું એ તેમની નવી સરકારનું મુખ્ય લક્ષ્ય રહેશે.
તારિક રહેમાનના આ નિવેદનો બાદ હવે ભારત સરકાર અને દક્ષિણ એશિયાના રાજકીય વિશ્લેષકોની નજર બાંગ્લાદેશના આગામી પગલાં પર મંડાયેલી છે.