દેશની રાજધાની દિલ્હીમાં શિક્ષણ જગત ફરી એકવાર વિવાદોના વંટોળમાં ફસાયું છે. એક તરફ જવાહરલાલ નેહરુ યુનિવર્સિટી (જેએનયુ) માં કોંગ્રેસ નેતા અને પૂર્વ વિદ્યાર્થી સંઘ પ્રમુખ કન્હૈયા કુમારનો ડફલી વગાડતો અને સૂત્રોચ્ચાર કરતો વીડિયો વાયરલ થયો છે, તો બીજી તરફ દિલ્હી યુનિવર્સિટી (ડીયુ) માં યુજીસીના સમર્થનમાં થઈ રહેલા પ્રદર્શન દરમિયાન એક મહિલા પત્રકાર સાથે ભીડ દ્વારા કરાયેલી ગેરવર્તણૂકે ચકચાર જગાવી છે. આ બંને ઘટનાઓએ વિદ્યાર્થી રાજકારણ અને કેમ્પસમાં કાયદો અને વ્યવસ્થાની સ્થિતિ પર ગંભીર સવાલો ઉભા કર્યા છે.

પ્રાપ્ત વિગતો અનુસાર, જેએનયુમાં યુનિવર્સિટી ગ્રાન્ટ્સ કમિશન (યુજીસી) ના મુદ્દે ચાલી રહેલા વિરોધ પ્રદર્શનમાં કન્હૈયા કુમાર પોતાના જૂના અંદાજમાં જોવા મળ્યા હતા. સોશિયલ મીડિયા પર વાયરલ થયેલા વીડિયોમાં તેઓ ડફલી વગાડી રહ્યા છે અને તેમની આસપાસ ઉભેલા વિદ્યાર્થીઓ 'બ્રાહ્મણવાદ સે આઝાદી' અને 'મનુવાદ સે આઝાદી' જેવા નારા લગાવી રહ્યા છે. દાવો કરવામાં આવી રહ્યો છે કે આ પ્રદર્શન જેએનયુ વિદ્યાર્થી સંઘના અધ્યક્ષ અદિતિ મિશ્રાના નેતૃત્વમાં યોજાયું હતું. આ વીડિયો સામે આવતા જ સોશિયલ મીડિયા પર પક્ષ અને વિપક્ષમાં જોરદાર ચર્ચાઓ શરૂ થઈ ગઈ છે.

બીજી તરફ, દિલ્હી યુનિવર્સિટીમાં સ્થિતિ વધુ ગંભીર બની હતી જ્યારે એક મહિલા પત્રકાર રુચિ તિવારી સાથે કથિત રીતે અભદ્ર વ્યવહાર કરવામાં આવ્યો હતો. પીડિત પત્રકારના જણાવ્યા મુજબ, તેઓ કવરેજ માટે ગયા હતા ત્યારે ત્યાં હાજર ભીડમાંથી કોઈએ તેમનું નામ અને જાતિ પૂછી હતી. જેવી તેમની ઓળખ જાહેર થઈ, લગભગ ૫૦૦ જેટલા લોકોના ટોળાએ તેમને ઘેરી લીધા હતા. પત્રકારે ગંભીર આરોપ લગાવ્યો છે કે ભીડ દ્વારા તેમની સાથે ગાળાગાળી કરવામાં આવી, જાતિસૂચક ટિપ્પણીઓ કરવામાં આવી અને બળાત્કાર જેવી ગંભીર ધમકીઓ પણ આપવામાં આવી હતી. લોકશાહીમાં ચોથા સ્તંભ સમાન પત્રકારો પર, અને તેમાં પણ ખાસ કરીને મહિલા પત્રકાર પર યુનિવર્સિટી કેમ્પસમાં થયેલા આ હુમલાએ અભિવ્યક્તિની સ્વતંત્રતા અને સુરક્ષા અંગે ગંભીર ચિંતાઓ જન્માવી છે.