થુનાગ/મંડી: આખું શિખર અને ખીણો જ્યારે 'હર હર મહાદેવ'ના નાદથી ગુંજી રહી હતી, ત્યારે હિમાચલ પ્રદેશના મંડી જિલ્લાના સરાજમાં એક ભયાનક ચીસ ગુંજી ઉઠી. રવિવારની વહેલી સવારે જ્યારે દુનિયા ગાઢ નિંદ્રામાં હતી, ત્યારે ચાર મિત્રો જીપ લઈને સફરે નીકળ્યા હતા, પરંતુ તેમને ક્યાં ખબર હતી કે કાળ તેમની રાહ જોઈ રહ્યો છે. લંબાથચ-કલ્હાની રોડ પર બુનાલીધર પાસે તેમની જીપ નિયંત્રણ ગુમાવીને ૨૦૦ મીટર ઊંડી ખાઈમાં ખાબકી હતી. આ અકસ્માત એટલો ભયાનક હતો કે બે યુવાનોએ તો ઘટનાસ્થળે જ દમ તોડી દીધો હતો, જ્યારે ત્રીજા મિત્રનું હોસ્પિટલમાં સારવાર દરમિયાન કરુણ મોત નીપજ્યું હતું.

બનાવની વિગતો મુજબ, બગસ્યાદના રહેવાસી યોગરાજની જીપ (HP65 5148) લઈને તેમનો પુત્ર હાર્દિક અને તેના ત્રણ મિત્રો સવારે ૪ વાગ્યે કોઈને પણ કહ્યા વગર ઘરેથી નીકળ્યા હતા. ઘરથી માત્ર ૨૪ કિલોમીટર દૂર પહાડી રસ્તા પર કાળચક્ર ફર્યું અને વાહન સીધું પાતાળ જેવી ખીણમાં જઈ પડ્યું. પર્વતોની વચ્ચે વાહન પડવાનો પ્રચંડ અવાજ સાંભળીને આસપાસના ગ્રામજનો દોડી આવ્યા હતા. દ્રશ્ય એટલું કમકમાટીભર્યું હતું કે વાહનનો કચ્ચરઘાણ નીકળી ગયો હતો અને લોહીલુહાણ હાલતમાં મિત્રો અહીં-તહીં પડેલા હતા. આ અકસ્માતમાં વાહન માલિકના પુત્ર હાર્દિકે પણ જીવ ગુમાવ્યો છે, જેના કારણે આખા પંથકમાં અરેરાટી વ્યાપી ગઈ છે.

પોલીસ સ્ટેશન ઈન્ચાર્જ રામકૃષ્ણના જણાવ્યા અનુસાર, પ્રાથમિક તપાસમાં આ યુવાનો ITI ના વિદ્યાર્થીઓ હોવાનું બહાર આવ્યું છે. અંધારામાં વળાંક પર કાબૂ ગુમાવવાને કારણે આ દુર્ઘટના સર્જાઈ હોવાનું અનુમાન છે. હાલમાં એક ઘાયલ યુવક હોસ્પિટલમાં જીવન-મરણ વચ્ચે ઝોલા ખાઈ રહ્યો છે. શિવરાત્રીના પવિત્ર દિવસે જ્યાં આસપાસના ઘરોમાં પૂજાની તૈયારીઓ થતી હતી, ત્યાં આ ત્રણ પરિવારોમાં પુત્રોના મોતના સમાચાર પહોંચતા આક્રંદ છવાઈ ગયો હતો. પોલીસે મૃતદેહોનું પોસ્ટમોર્ટમ કરાવી અકસ્માત પાછળના ચોક્કસ કારણોની તપાસ શરૂ કરી છે.