નવી દિલ્હી : ભારતના વડાપ્રધાન નરેન્દ્રભાઈ મોદીની વધતી જતી વૈશ્વિક લોકપ્રિયતા અને ભારતના રાજદ્વારી મહત્વનો અંદાજ એ વાત પરથી લગાવી શકાય છે કે હાલમાં વિશ્વના બે મહત્વના દેશો પીએમ મોદીના સમય માટે ખેંચતાણ કરી રહ્યા છે. આગામી ૧૭ ફેબ્રુઆરીની તારીખ ભારતીય વિદેશ મંત્રાલય માટે મોટી કસોટી સમાન બની ગઈ છે. એક તરફ બાંગ્લાદેશ છે અને બીજી તરફ યુરોપિયન મહાસત્તા ફ્રાન્સ છે.

વિગતો મુજબ, બાંગ્લાદેશમાં રાજકીય ઉથલપાથલ બાદ રચાનારી નવી સરકાર ૧૭ ફેબ્રુઆરીએ શપથ ગ્રહણ કરવા જઈ રહી છે. બાંગ્લાદેશના નવા નેતૃત્વએ ભારત સાથેના સંબંધો સુધારવા અને નવી શરૂઆત કરવા માટે પીએમ મોદીને મુખ્ય અતિથિ તરીકે આમંત્રણ પાઠવ્યું છે. ભારતની 'નેબરહૂડ ફર્સ્ટ' (પડોશી પ્રથમ) ની નીતિ મુજબ આ મુલાકાત અત્યંત મહત્વની છે. જો મોદી ત્યાં જાય છે, તો તે ક્ષેત્રમાં સ્થિરતા અને ભારતના પ્રભાવ માટે મોટું પગલું ગણાશે.
બીજી તરફ, ૧૭ ફેબ્રુઆરીએ જ ફ્રાન્સના રાષ્ટ્રપતિ ઈમેન્યુઅલ મેક્રોન ભારતની મુલાકાતે આવી રહ્યા હોવાનું આયોજન છે. મુંબઈ ખાતે યોજાનારી એક હાઈ-પ્રોફાઈલ બિઝનેસ સમિટ અને સંરક્ષણ કરારો માટે મોદી અને મેક્રોનની મુલાકાત પહેલેથી જ નિર્ધારિત છે. ફ્રાન્સ ભારતનો સૌથી વિશ્વસનીય વ્યૂહાત્મક ભાગીદાર છે. હવે સવાલ એ છે કે પીએમ મોદી કયા કાર્યક્રમને પ્રાધાન્ય આપશે? સૂત્રોના જણાવ્યા અનુસાર, પીએમ મોદી કદાચ બાંગ્લાદેશમાં વિદેશ મંત્રી એસ. જયશંકર અથવા ઉપરાષ્ટ્રપતિને મોકલી શકે છે અને પોતે ફ્રાન્સના રાષ્ટ્રપતિ સાથેની બેઠકમાં હાજરી આપે તેવી શક્યતા છે. જોકે, આ અંગેનો સત્તાવાર નિર્ણય છેલ્લી ઘડીએ લેવામાં આવશે.*