નવી દિલ્હી:  નવી દિલ્હી ફરી એકવાર વૈશ્વિક શક્તિના કેન્દ્ર તરીકે ઉભરી આવ્યું છે. 16 થી 20 ફેબ્રુઆરી દરમિયાન પ્રગતિ મેદાનના 'ભારત મંડપમ' ખાતે આયોજિત "ઇન્ડિયા AI ઇમ્પેક્ટ સમિટ 2026" માટે દિલ્હી પોલીસ અને સુરક્ષા એજન્સીઓએ આખા શહેરને એક અભેદ્ય કિલ્લામાં ફેરવી દીધું છે. ફ્રાન્સ બાદ વિશ્વનો સૌથી મોટો AI કાર્યક્રમ હોવાથી, તેમાં વિશ્વના 15 શક્તિશાળી રાષ્ટ્રાધ્યક્ષો અને ગૂગલ, મેટા તથા માઇક્રોસોફ્ટ જેવી કંપનીઓના 40 થી વધુ સીઈઓ ઉપસ્થિત રહેવાના છે. આ મહાનુભાવોની સુરક્ષા માટે પાંચ લેયરનું સુરક્ષા કવચ તૈયાર કરવામાં આવ્યું છે, જેમાં આધુનિક ટેકનોલોજી અને માનવીય સતર્કતાનો અદભૂત સમન્વય જોવા મળી રહ્યો છે.

સુરક્ષાની સૌથી મોટી વિશેષતા 'એન્ટી-ડ્રોન શિલ્ડ' છે. ભારત મંડપમની આસપાસ પાંચ અત્યાધુનિક એન્ટી-ડ્રોન સિસ્ટમ અને ચાર એર ડિફેન્સ ગન તૈનાત કરવામાં આવી છે, જે કોઈપણ શંકાસ્પદ હવાઈ ગતિવિધિને સેકન્ડોમાં નિષ્ક્રિય કરી શકે છે. જમીન પર 500 થી વધુ સીસીટીવી કેમેરા ચોવીસે કલાક 'રીઅલ-ટાઇમ' મોનિટરિંગ કરી રહ્યા છે, જેનું સંચાલન NDMC ના કમાન્ડ સેન્ટર દ્વારા કરવામાં આવે છે. આ સિસ્ટમ એટલી સચોટ છે કે તે ગીચ ભીડમાં પણ શંકાસ્પદ હિલચાલને ઓળખી કાઢવામાં સક્ષમ છે. આ ઉપરાંત, 25 જેટલી એન્ટી-સેબોટેજ ટીમો અને 12 બોમ્બ ડિસ્પોઝલ સ્ક્વોડ સતત સર્ચ ઓપરેશન ચલાવી રહ્યા છે.

વિદેશી મહેમાનોના સ્વાગત માટે દિલ્હીની 10 લક્ઝરી હોટલોને છાવણીમાં ફેરવી દેવામાં આવી છે, જેની સુરક્ષાની જવાબદારી સીધી DCP સ્તરના અધિકારીઓને સોંપવામાં આવી છે. ટ્રાફિક મેનેજમેન્ટ માટે 5,000 થી વધુ પોલીસકર્મીઓ તૈનાત છે, જેથી સામાન્ય જનતાને તકલીફ ન પડે અને વિદેશી મહેમાનોના કાફલા પણ સુરક્ષિત રીતે પસાર થઈ શકે. સ્વચ્છતા અને પર્યાવરણનું ધ્યાન રાખવા માટે 20 પ્રદૂષણ સેન્સર અને ડિજિટલ કચરો સંગ્રહ સિસ્ટમ કાર્યરત કરવામાં આવી છે. આ સમિટ માત્ર ટેકનોલોજીની ચર્ચા માટે નથી, પરંતુ ભારતની સુરક્ષા અને વ્યવસ્થાપન શક્તિનું વિશ્વ ફલક પર પ્રદર્શન કરવાની પણ એક મોટી તક છે.