ચંદીગઢ : પંજાબના મુખ્યમંત્રી ભગવંત માનની તબિયત રવિવારે અચાનક લથડતા તેમને તાત્કાલિક મોહાલીની ફોર્ટિસ હોસ્પિટલમાં દાખલ કરવામાં આવ્યા છે. સંગરૂર જિલ્લાની મુલાકાત દરમિયાન મુખ્યમંત્રીએ અસ્વસ્થતાની ફરિયાદ કરી હતી, ત્યારબાદ સાવચેતીના ભાગરૂપે તેમને એરલિફ્ટ કરીને મોહાલી હોસ્પિટલ પહોંચાડવામાં આવ્યા હતા.
મહાશિવરાત્રિના દર્શન બાદ તબિયત બગડી
રવિવારે સવારે મહાશિવરાત્રિના પાવન અવસરે મુખ્યમંત્રી ભગવંત માન આમ આદમી પાર્ટીના સંયોજક અરવિંદ કેજરીવાલ અને મનીષ સિસોદિયા સાથે સંગરૂર જિલ્લાના ધૂરી સ્થિત શ્રી રણકેશ્વર મહાદેવ શિવ મંદિરે પૂજા-અર્ચના કરવા પહોંચ્યા હતા. મંદિરે દર્શન અને જળાભિષેક કર્યાના થોડા સમય બાદ તેમને શરીરમાં નબળાઈ અને અસ્વસ્થતાનો અનુભવ થયો હતો. સ્થિતિ ગંભીર જણાતા તેમને તાત્કાલિક હોસ્પિટલ લઈ જવાનો નિર્ણય લેવાયો હતો.
ડોક્ટરોની ટીમ દ્વારા તપાસ
હાલમાં મોહાલીની ફોર્ટિસ હોસ્પિટલના નિષ્ણાત ડોક્ટરોની ટીમ મુખ્યમંત્રીના સ્વાસ્થ્યની તપાસ કરી રહી છે. જોકે, હોસ્પિટલ પ્રશાસન કે મુખ્યમંત્રી કાર્યાલય દ્વારા તેમની સ્થિતિ અંગે હજુ સુધી કોઈ સત્તાવાર નિવેદન કે હેલ્થ બુલેટિન જારી કરવામાં આવ્યું નથી. અત્રે ઉલ્લેખનીય છે કે, ભગવંત માનની તબિયત બગડવાને કારણે તેમના ફાઝિલ્કા ખાતેના આગામી કાર્યક્રમો હાલ પૂરતા સ્થગિત કરી દેવામાં આવ્યા છે.
ભૂતકાળમાં પણ સ્વાસ્થ્ય સમસ્યાઓ રહી હતી
આ અગાઉ ગત વર્ષે સપ્ટેમ્બર મહિનામાં પણ મુખ્યમંત્રી ભગવંત માનને થાક અને હૃદયના ધબકારામાં અનિયમિતતાને કારણે આ જ હોસ્પિટલમાં દાખલ કરવામાં આવ્યા હતા. તે સમયે પણ તેઓ લાંબા સમય સુધી ડોક્ટરોની દેખરેખ હેઠળ રહ્યા હતા. હાલમાં તેમના સમર્થકો અને પક્ષના કાર્યકરો તેમના ઝડપથી સ્વસ્થ થવાની પ્રાર્થના કરી રહ્યા છે.