વિકસિત ભારતના લક્ષ્યને હાંસલ કરવા માટે પ્રધાનમંત્રી નરેન્દ્ર મોદીએ ખાનગી ક્ષેત્રની ભૂમિકાને અત્યંત મહત્વની ગણાવી છે. તેમણે ઉદ્યોગ જગતને આહવાન આપ્યું છે કે આગામી પગલાં નવા સંશોધનો, દીર્ઘકાલીન ક્ષમતા નિર્માણ અને વૈશ્વિક સ્પર્ધાત્મકતામાં સાહસિક રોકાણ પર નિર્ભર રહેશે. પ્રધાનમંત્રીએ સ્પષ્ટ કર્યું કે સરકાર માત્ર સુવિધા આપનારની ભૂમિકા ભજવી શકે છે, પરંતુ વાસ્તવિક ગતિ ખાનગી ક્ષેત્રના ઉત્સાહથી જ આવશે. તેમણે ઉદ્યોગપતિઓને વૈશ્વિક સ્તરે સ્પર્ધા કરવા માટે પોતાની ગુણવત્તા સુધારવા પર ભાર મૂક્યો હતો.

આ દરમિયાન પ્રધાનમંત્રીએ એક સામાજિક જવાબદારીનો મુદ્દો પણ ઉઠાવ્યો હતો. તેમણે કહ્યું કે જેમ જેમ ટેકનોલોજી અને કાર્યક્ષમતા વધવાને કારણે કંપનીઓની ઉત્પાદકતા વધે છે, તેમ તેમ ખાનગી ક્ષેત્રના માલિકોએ તેમના નફાનો એક ઉચિત હિસ્સો શ્રમિકો સાથે પણ વહેંચવો જોઈએ. શ્રમિકોના કલ્યાણ વિના લાંબા ગાળાનો વિકાસ શક્ય નથી. મોદીએ જણાવ્યું કે જ્યારે શ્રમિકો આર્થિક રીતે સધ્ધર બનશે, ત્યારે દેશની ખરીદશક્તિ વધશે અને તેનાથી અંતે ઉદ્યોગોને જ ફાયદો થશે. આમ, તેમણે વિકાસના ફળ છેવાડાના માનવી સુધી પહોંચાડવા માટે ઉદ્યોગ જગતને પ્રોત્સાહિત કર્યા હતા.