રાંચી : ન્યાયતંત્ર અને વકીલો વચ્ચેના પરસ્પર સન્માનની મર્યાદા કેટલી મહત્વની છે, તેનો એક જીવતો જાગતો કિસ્સો ઝારખંડ હાઈકોર્ટમાં જોવા મળ્યો હતો. લાંબા સમયથી ચાલી રહેલા 'કોર્ટની અવમાનના' (Contempt of Court) ના હાઈ-પ્રોફાઈલ કેસમાં આખરે એડવોકેટ મહેશ તિવારીને રાહત મળી છે. હાઈકોર્ટે વકીલની બિનશરતી માફીનો સ્વીકાર કરીને તેમની સામેની કાનૂની કાર્યવાહી બંધ કરવાનો આદેશ આપ્યો છે.
શું હતી એ 'ગરમાગરમ' ઘટના?
આ વિવાદની શરૂઆત ઓક્ટોબર 2025માં થઈ હતી, જ્યારે જસ્ટિસ રાજેશ કુમારની કોર્ટમાં એક કેસની સુનાવણી ચાલી રહી હતી. દલીલો દરમિયાન મામલો એટલો બિચક્યો કે એડવોકેટ મહેશ તિવારીએ સીધા જ જજને ઉદ્દેશીને કહી દીધું હતું કે, "તમારી મર્યાદામાં રહો... કોઈનું અપમાન ન કરો... મર્યાદા ઓળંગશો નહીં." આ ઘટનાનો વિડિયો અને સમાચાર સોશિયલ મીડિયા પર વાયરલ થયા હતા, જેના કારણે કોર્ટની ગરિમાને ઠેસ પહોંચી હોવાનું માની તેમની સામે ફોજદારી અવમાનનાનો કેસ નોંધાયો હતો.
સુપ્રીમ કોર્ટની એન્ટ્રી અને માફી
આ મામલો જ્યારે સુપ્રીમ કોર્ટ સુધી પહોંચ્યો, ત્યારે સર્વોચ્ચ અદાલતે વકીલને સલાહ આપી હતી કે સંસ્થાની ગરિમા જાળવવી એ દરેક કાયદાકીય વ્યાવસાયિકની ફરજ છે. સુપ્રીમ કોર્ટના નરમ વલણ અને માર્ગદર્શન બાદ, મહેશ તિવારીએ ઝારખંડ હાઈકોર્ટ સમક્ષ હાજર થઈને પોતાની ભૂલ સ્વીકારી હતી અને લેખિતમાં બિનશરતી માફી માંગી હતી.
હાઈકોર્ટનો ઉદાર નિર્ણય
સોમવારે આ કેસની સુનાવણી દરમિયાન ઝારખંડ હાઈકોર્ટે નોંધ્યું કે વકીલને પોતાની ભૂલનો પસ્તાવો છે. કોર્ટે તેમની માફી સ્વીકારી લીધી અને તેમની સામેનો કેસ ફગાવી દીધો. આ નિર્ણય સાથે જ છેલ્લા કેટલાક મહિનાઓથી ચાલી રહેલા વકીલ-જજ વિવાદનો કાયમી અંત આવ્યો છે.
કાયદાકીય નિષ્ણાતોનું કહેવું છે કે આ કેસ વકીલો માટે એક શીખ સમાન છે કે કોર્ટરૂમમાં દલીલો ગમે તેટલી ઉગ્ર હોય, પરંતુ શબ્દોની મર્યાદા જાળવવી અનિવાર્ય છે.