નવી દિલ્હી:  ભારતની સૌથી મોટી કાર ઉત્પાદક કંપની મારુતિ સુઝુકીએ આજે દેશના ઇલેક્ટ્રિક વ્હીકલ (EV) માર્કેટમાં ક્રાંતિકારી પગલું ભર્યું છે. લાંબા સમયની રાહ જોયા બાદ, કંપનીએ તેની પ્રથમ ઓલ-ઇલેક્ટ્રિક SUV e-Vitara ના ભાવ જાહેર કરીને સત્તાવાર વેચાણ શરૂ કર્યું છે. આ કારને તેના પ્રીમિયમ NEXA નેટવર્ક દ્વારા વેચવામાં આવશે.
શું છે BaaS મોડેલ અને કિંમત?
મારુતિએ આ કારને વધુ સસ્તી અને સુલભ બનાવવા માટે Battery-as-a-Service (BaaS) મોડેલ રજૂ કર્યું છે.
•    શરૂઆતી કિંમત: આ મોડેલ હેઠળ કારની એક્સ-શોરૂમ કિંમત ₹૧૦.૯૯ લાખ થી શરૂ થાય છે.
•    બેટરી EMI: ગ્રાહકોએ બેટરીનો ખર્ચ અગાઉથી ચૂકવવાની જરૂર નથી. તેના બદલે, વપરાશ મુજબ પ્રતિ કિલોમીટર માત્ર ₹૩.૯૯ ના દરે EMI ચૂકવવાનો રહેશે.
•    આ કિંમત ૩૧ માર્ચ, ૨૦૨૬ સુધી ખરીદનારા ગ્રાહકો માટે જ માન્ય રહેશે.
 
બુકિંગ અને સુવિધાઓ
રસ ધરાવતા ગ્રાહકો માત્ર ₹૨૧,૦૦૦ ની ટોકન રકમ ચૂકવીને નેક્સા શોરૂમ અથવા ઓનલાઇન વેબસાઇટ પરથી કાર બુક કરાવી શકે છે.
•    રેન્જ: ઉચ્ચ વેરિઅન્ટમાં સિંગલ ચાર્જ પર ૫૪૩ કિલોમીટર સુધીની શાનદાર રેન્જનો દાવો કરવામાં આવ્યો છે.
•    બેટરી ઓપ્શન: ગ્રાહકોને ૪૯ kWh અને ૬૧ kWh ના બે બેટરી પેક વિકલ્પો મળશે.
•    લોન્ચ ઓફર્સ: શરૂઆતના ગ્રાહકોને ₹૫૦,૦૦૦ ની કિંમતનો હોમ ચાર્જર અને ઇન્સ્ટોલેશન ફ્રી આપવામાં આવશે, સાથે જ એક વર્ષ માટે ફ્રી પબ્લિક ચાર્જિંગની સુવિધા પણ મળશે.
 
પ્રીમિયમ ઇન્ટિરિયર અને સેફ્ટી
મારુતિ e-Vitara અત્યાર સુધીની સૌથી પ્રીમિયમ મારુતિ કાર હોવાનું મનાય છે. તેમાં ૧૦.૨૫-ઇંચની ડિજિટલ સ્ક્રીન, ફિક્સ્ડ ગ્લાસ સનરૂફ, વેન્ટિલેટેડ સીટ્સ અને Level 2 ADAS જેવા અત્યાધુનિક સેફ્ટી ફીચર્સ આપવામાં આવ્યા છે. સાત એરબેગ્સ આ કારમાં સ્ટાન્ડર્ડ તરીકે મળશે.
ટાટા નેક્સન EV અને હ્યુન્ડાઇ ક્રેટા EV જેવી કાર સામે સ્પર્ધા કરવા માટે મારુતિએ જે પ્રાઇસ ગેમ રમી છે, તે જોતા આગામી સમયમાં ઇલેક્ટ્રિક કાર બજારમાં મોટી હલચલ જોવા મળી શકે છે.