નવી દિલ્હી: યોગગુરુ બાબા રામદેવે પોતાના નામ, અવાજ, છબી અને વાતચીત કરવાની વિશિષ્ટ શૈલીના રક્ષણ માટે દિલ્હી હાઈકોર્ટમાં ધા નાખી છે. તેમણે પોતાની અરજીમાં માંગ કરી છે કે, તેમની પરવાનગી વિના કોઈપણ સોશિયલ મીડિયા પ્લેટફોર્મ કે વ્યક્તિ તેમના વ્યક્તિત્વ સાથે જોડાયેલી કોઈપણ વસ્તુનો ઉપયોગ ન કરી શકે. ખાસ કરીને આજના સમયમાં આર્ટિફિશિયલ ઇન્ટેલિજન્સ (AI) અને ડીપફેક ટેકનોલોજી દ્વારા કરવામાં આવતા દુરુપયોગ અંગે તેમણે ગંભીર ચિંતા વ્યક્ત કરી છે.
AI અને ડીપફેક દ્વારા થતી છેતરપિંડી પર નિશાન
બાબા રામદેવનો આરોપ છે કે વિવિધ સોશિયલ મીડિયા પ્લેટફોર્મ્સ પર ડીપફેક વીડિયો અને AI દ્વારા તૈયાર કરવામાં આવેલી સામગ્રીનો ઉપયોગ કરીને તેમની છબી ખરડવામાં આવી રહી છે. ઘણીવાર તેમના અવાજ અને ચહેરાનો ઉપયોગ કરીને ખોટા સંદેશાઓ ફેલાવવામાં આવે છે, જેમનાથી લોકો ગેરમાર્ગે દોરાય છે. તેમણે કોર્ટને વિનંતી કરી છે કે આવા તમામ કન્ટેન્ટ પર તાત્કાલિક પ્રતિબંધ મૂકવામાં આવે.
 
સોશિયલ મીડિયા પ્લેટફોર્મ ‘X’ ની દલીલ
આ મામલે સુનાવણી દરમિયાન, સોશિયલ મીડિયા જાયન્ટ 'X' (અગાઉનું ટ્વિટર) એ પોતાનો પક્ષ રાખ્યો હતો. કંપનીએ દલીલ કરી હતી કે રાજકીય કટાક્ષ, વ્યંગ્ય (Satire) અને જાહેર જનતાની અભિવ્યક્તિની આઝાદીને રોકી શકાય નહીં. પ્લેટફોર્મે જણાવ્યું કે વ્યક્તિગત અધિકારોના રક્ષણના નામે તમામ પ્રકારના રાજકીય ભાષણો કે કોમેડીને હટાવવાનો આદેશ આપવો યોગ્ય નથી.
 
સેલિબ્રિટીઝમાં વધી રહ્યો છે ટ્રેન્ડ
નોંધનીય છે કે, બાબા રામદેવ પહેલા બોલિવૂડ અભિનેતા અમિતાભ બચ્ચન, અનિલ કપૂર, અભિષેક બચ્ચન, ઐશ્વર્યા રાય અને ક્રિકેટ જગતના દિગ્ગજ સુનીલ ગાવસ્કર જેવી હસ્તીઓ પણ પોતાના 'પર્સનાલિટી રાઈટ્સ' સુરક્ષિત કરવા માટે કોર્ટમાં જઈ ચૂકી છે. આ કિસ્સાઓમાં કોર્ટે વચગાળાની રાહત આપતા તેમની પરવાનગી વગર તેમના નામ કે અવાજના કોમર્શિયલ ઉપયોગ પર રોક લગાવી છે.
હવે જોવાનું એ રહેશે કે કોર્ટ બાબા રામદેવની અરજી પર કેવો ફેંસલો આપે છે અને 'અભિવ્યક્તિની આઝાદી' તથા 'વ્યક્તિગત અધિકાર' વચ્ચે કેવું સંતુલન જાળવે છે.