જે નીચે પડયા છે તેમને ઉઠાવવા પડશે
UGC માર્ગદર્શિકા પર મોહન ભાગવતનું મોટું નિવેદન : દરેક નાગરિકે કાયદાનું પાલન કરવું જરૂરી છે. જો કોઈ કાયદો યોગ્ય ન લાગતો હોય તો તેને બદલવા માટે લોકશાહી પદ્ધતિ ઉપલબ્ધ છે
લખનૌ,તા.૧૮: રાષ્ટ્રીય સ્વયંસેવક સંઘ ના સરસંઘચાલક મોહન ભાગવતે UGC માર્ગદર્શિકા અંગે ચાલી રહેલી ચર્ચા વચ્ચે પોતાનું મંતવ્ય જાહેર કર્યું છે. વાસ્તવમાં લખનૌના નિરાલા નગર વિસ્તારમાં સ્થિત સરસ્વતી શિશુ મંદિરમાં આયોજિત સામાજિક સંવાદિતા સભામાં સંબોધન કરતા તેમણે કાયદા અને સામાજિક સમરસતા પર ભાર મૂક્યો.
UGC માર્ગદર્શિકા અંગે પૂછાયેલા પ્રશ્નના જવાબમાં ભાગવતે જણાવ્યું કે, દરેક નાગરિકે કાયદાનું પાલન કરવું જરૂરી છે. જો કોઈ કાયદો યોગ્ય ન લાગતો હોય તો તેને બદલવા માટે લોકશાહી પદ્ધતિ ઉપલબ્ધ છે. તેમણે ઉમેર્યું કે આ મુદ્દે અલગ-અલગ પક્ષોની પોતાની લ્લષ્ટિ હોઈ શકે છે, પરંતુ સમાજમાં વિવાદ વધે તે યોગ્ય નથી.
ભાગવતે પોતાના ભાષણ દરમિયાન સામાજિક સમરસતાની વાત કરતા કહ્યું કે, સમાજમાં જે લોકો પાછળ રહી ગયા છે તેમને આગળ લાવવા સૌએ પ્રયાસ કરવો જોઈએ. તેમણે જણાવ્યું કે જાતિ કે અન્ય કોઈ કારણ સમાજમાં સંઘર્ષનું કારણ ન બનવું જોઈએ. દુનિયા ઝઘડાથી નહીં, પણ પરસ્પર સંકલન અને સહકારથી આગળ વધે છે. તેમણે કહ્યું કે દરેક વ્યક્તિ પ્રત્યે પોતાના જેવા સ્નેહ અને લાગણી હોવી જોઈએ. જો સમાજમાં પરસ્પર વિશ્વાસ મજબૂત બનશે તો ઘણી ગેરસમજો આપોઆપ દૂર થઈ જશે.
મોહન ભાગવતે વિશ્વ પરિસ્થિતિ અંગે પણ વિચાર વ્યક્ત કર્યો. તેમના મતે, ભારત પાસે એવી સંસ્કૃતિ અને મૂલ્યો છે જે વૈશ્વિક સમસ્યાઓના ઉકેલમાં માર્ગદર્શન આપી શકે છે. તેમણે સ્થાનિક સ્તરે સામાજિક સંવાદિતા માટે નિયમિત બેઠકો યોજવાની અપીલ કરી, જેથી લોકો એકબીજાને સમજી શકે અને ગેરસમજ દૂર થાય. સાથે જ તેમણે ચેતવણી આપી કે આંતરરાષ્ટ્રીય સ્તરે કેટલાક તત્વો ભારતની એકતાને નુકસાન પહોંચાડવા પ્રયાસ કરી શકે છે, તેથી સતર્ક રહેવું જરૂરી છે.
ભાગવતે હિન્દુ સમાજની ઘટતી વસ્તી અંગે ચિંતા વ્યક્ત કરી. તેમના અનુસાર, સમાજને મજબૂત બનાવવા પરિવારોમાં જાગૃતિ આવવી જોઈએ. તેમણે ધર્માંતરણ અને ઘૂસણખોરી જેવા મુદ્દાઓ પર પણ ધ્યાન દોર્યું અને કાયદાકીય પગલાં જરૂરી હોવાનું કહ્યું. તેમણે પરિવાર વ્યવસ્થાને મજબૂત બનાવવાની અને નવદંપતિઓને સમાજ પ્રત્યે જવાબદારી સમજાવવાની જરૂરિયાત પર ભાર મૂક્યો.
(10:03 AM IST)
છેલ્લા 8 દિવસમાં સૌથી લોકપ્રિય 
