શ્યોપુર (મધ્યપ્રદેશ) : ભારતની ધરતી પરથી વિલુપ્ત થયેલા ચિત્તાઓને પુનઃસ્થાપિત કરવાના અભિયાન 'પ્રોજેક્ટ ચિત્તા'માં આજે એક સુવર્ણ અધ્યાય ઉમેરાયો છે. મધ્યપ્રદેશના કુનો નેશનલ પાર્કમાં માદા ચિત્તા 'ગામિની'એ ૩ સ્વસ્થ બચ્ચાઓને જન્મ આપ્યો છે. આ સમાચાર એટલે પણ ખાસ છે કારણ કે દક્ષિણ આફ્રિકાથી ચિત્તા ભારતમાં આવ્યા તેની ત્રીજી વર્ષગાંઠ નિમિત્તે કુદરતે આ અનોખી ભેટ આપી છે.
 નવા ૩ નવજાત મહેમાનોના આગમન સાથે હવે કુનોમાં કુલ ચિત્તાઓની સંખ્યા વધીને ૩૮ થઈ ગઈ છે. નોંધનીય છે કે ભારતની ધરતી પર અત્યાર સુધીમાં કુલ ૨૭ બચ્ચાઓનો જન્મ થયો છે, જે સાબિત કરે છે કે વિદેશી ચિત્તાઓ હવે ભારતીય આબોહવાને સંપૂર્ણપણે અપનાવી ચૂક્યા છે. ગામિનીએ અગાઉ માર્ચ ૨૦૨૪માં ૬ બચ્ચાઓને જન્મ આપીને રેકોર્ડ સર્જ્યો હતો, અને હવે તે બીજી વખત માતા બની છે.
 પ્રોજેક્ટની શરૂઆતમાં વન્યજીવ નિષ્ણાતો માનતા હતા કે જો લાવવામાં આવેલા ચિત્તામાંથી ૩૩% પણ બચી જાય તો મોટી સફળતા ગણાશે. પરંતુ વાસ્તવિકતા વધુ સુખદ છે. દક્ષિણ આફ્રિકાથી લાવવામાં આવેલા ૧૨ ચિત્તાઓમાંથી માત્ર ૪ ના જ મૃત્યુ થયા છે, જ્યારે બાકીના ચિત્તાઓએ કુદરતી રીતે પ્રજનન શરૂ કરી દીધું છે. ગામિની સિવાય નીરવા અને વીરા જેવી માદા ચિત્તાઓ પણ સફળતાપૂર્વક બચ્ચાઓને જન્મ આપી ચૂકી છે.
પ્રોજેક્ટ ડિરેક્ટર ઉત્તમ કુમાર શર્માએ જણાવ્યું કે, આ સફળતાથી ઉત્સાહિત થઈને હવે પ્રોજેક્ટના ત્રીજા તબક્કાની તૈયારીઓ પૂર્ણ કરી લેવામાં આવી છે. ૨૮ ફેબ્રુઆરીના રોજ આફ્રિકન દેશ બોત્સ્વાનાથી વધુ ૮ ચિત્તાઓ ભારત લાવવામાં આવશે. આ નવા ચિત્તાઓ પ્રોજેક્ટમાં જીનેટિક વિવિધતા વધારવામાં મદદ કરશે. હાલમાં, કુનોનું વનતંત્ર આ શિકારી પ્રાણીઓ માટે સ્વર્ગ સમાન બની ગયું છે.
કુનોના ચિત્તા પરિવારની સ્થિતિ:
• નર ચિત્તા: પ્રભાષ, પાવક, વાયુ, અગ્નિ.
• માદા ચિત્તા: ગામિની, નીરવા, વીરા, ધીરા.
• નવા રહેઠાણ: પ્રભાષ, પાવક અને ધીરાને હવે મંદસૌરના ગાંધી સાગર અભયારણ્યમાં ખસેડવામાં આવ્યા છે