નવી દિલ્હી : દુનિયાનું સૌથી લોકપ્રિય મેસેજિંગ પ્લેટફોર્મ WhatsApp એક એવા ફીચર પર કામ કરી રહ્યું છે જે વપરાશકર્તાઓનો અનુભવ સંપૂર્ણપણે બદલી નાખશે. અત્યાર સુધી કોઈનું સ્ટેટસ જોવા માટે આપણે 'અપડેટ્સ' ટેબમાં જવું પડતું હતું, પરંતુ હવે WhatsApp તમારા ચેટ્સ ટેબમાં જ સ્ટેટસ બતાવવાની તૈયારી કરી રહ્યું છે. આ ફેરફાર બાદ યુઝર્સને ફેસબુક કે ઈન્સ્ટાગ્રામ જેવો અનુભવ મળશે.
ચેટ ટેબમાં શું નવું જોવા મળશે?
WABetaInfo ના રિપોર્ટ મુજબ, WhatsApp તેના એન્ડ્રોઇડ બીટા વર્ઝન ૨.૨૬.૬.૯ માં એક નવી ડિઝાઈનનું પરીક્ષણ કરી રહ્યું છે. આ નવા અપડેટમાં:
•    ટોપ બાર ડિસ્પ્લે: તમારી ચેટ લિસ્ટની સૌથી ઉપર એક નવો બાર દેખાશે, જ્યાં તમે જેમના સંપર્કમાં વધુ હોવ તેવા મિત્રોના પ્રોફાઈલ પિક્ચર સ્ટેટસ અપડેટ સાથે જોવા મળશે.
•    સ્વાઇપ ફીચર: જો તમે ચેટ લિસ્ટમાં નીચે સ્ક્રોલ કરશો, તો વચ્ચે એક આખી પંક્તિ (Row) દેખાશે જેમાં ડાબે અને જમણે સ્વાઇપ કરીને બધા સ્ટેટસ જોઈ શકાશે.
શા માટે કરવામાં આવી રહ્યો છે આ ફેરફાર?
કંપનીનું માનવું છે કે હાલની પદ્ધતિમાં સ્ટેટસ જોવા માટે યુઝર્સે અલગ ટેબમાં જવું પડે છે, જેના કારણે ઘણા સ્ટેટસ મિસ થઈ જાય છે. નવા ફેરફારથી સ્ટેટસની 'વિઝિબિલિટી' એટલે કે જોવાની ક્ષમતા વધશે. હવે તમારે કોઈનું સ્ટેટસ જોવા માટે તેની ચેટ શોધવાની કે પ્રોફાઈલ પર ટેપ કરવાની રાહ જોવી નહીં પડે, બધું જ તમારી આંખોની સામે હશે.
પ્રાઈવસીનું પણ રખાશે ધ્યાન
મહત્વની વાત એ છે કે, જે સ્ટેટસ તમે 'મ્યૂટ' કર્યા હશે અથવા જે કોન્ટેક્ટ્સને હાઈડ કર્યા હશે, તે આ નવા ટોપ બારમાં દેખાશે નહીં. એટલે કે તમારી જૂની પ્રાઈવસી સેટિંગ્સ યથાવત રહેશે. હાલમાં આ ફીચર ડેવલપમેન્ટ સ્ટેજમાં છે અને ટૂંક સમયમાં જ તમામ ગ્લોબલ યુઝર્સ માટે રોલ આઉટ કરવામાં આવશે.