નવી દિલ્હી : ભારત અને ફ્રાન્સની મિત્રતા હવે માત્ર સંરક્ષણ અને આકાશ પૂરતી મર્યાદિત નથી રહી, પણ તે સામાન્ય માણસના સ્વાસ્થ્ય અને જીવન બચાવવા સુધી પહોંચી છે. ફ્રાન્સના રાષ્ટ્રપતિ ઇમેન્યુઅલ મેક્રોન અને કેન્દ્રીય આરોગ્ય મંત્રી જગત પ્રકાશ નડ્ડાએ આજે નવી દિલ્હીની પ્રતિષ્ઠિત AIIMS ખાતે 'ઇન્ડો-ફ્રેન્ચ સેન્ટર ઓન AI ઇન ગ્લોબલ હેલ્થ' (IF-CAIH) નું ઉદ્ઘાટન કરીને મેડિકલ સાયન્સમાં એક નવો અધ્યાય શરૂ કર્યો છે.
AI દ્વારા બીમારીઓનો સચોટ ઉકેલ
આ સેન્ટરનો મુખ્ય ઉદ્દેશ્ય આર્ટિફિશિયલ ઇન્ટેલિજન્સ (AI) ના ઉપયોગ દ્વારા જટિલ બીમારીઓનું વહેલું નિદાન અને વધુ સચોટ સારવાર પૂરી પાડવાનો છે. આ પહેલ AIIMS દિલ્હી, ફ્રાન્સની સોર્બોન યુનિવર્સિટી અને પેરિસ બ્રેઈન ઇન્સ્ટિટ્યૂટ વચ્ચેના કરારનું પરિણામ છે. જેમાં IIT દિલ્હી જેવી સંસ્થાઓ પણ ટેકનિકલ સાથ આપશે. ખાસ કરીને મગજના સ્વાસ્થ્ય અને વૈશ્વિક હેલ્થકેર સિસ્ટમમાં AI કેવી રીતે ક્રાંતિ લાવી શકે તેના પર અહીં સંશોધન થશે.
મેક્રોન અને ભારતીય યુવાનો વચ્ચે 'AI સંવાદ'
આ ઉદ્ઘાટન પ્રસંગે એક અનોખો નજારો જોવા મળ્યો હતો. 'RUSH 2026' કાર્યક્રમ અંતર્ગત રાષ્ટ્રપતિ મેક્રોને બે ભારતીય યુવા સંશોધકો સાથે ૩૦ મિનિટ સુધી ખાસ વાતચીત કરી હતી. તેમણે ભાર મૂક્યો હતો કે ભારત અને ફ્રાન્સે મળીને પોતાની સાર્વભૌમ (Sovereign) AI ક્ષમતા વિકસાવવી જોઈએ જેથી આપણે દુનિયાની મર્યાદિત ટેક-શક્તિઓ પર નિર્ભર ન રહેવું પડે.
માનવતાની સેવા માટે નૈતિક AI
રાષ્ટ્રપતિ મેક્રોને તેમના સંબોધનમાં જણાવ્યું કે, AI નો વિકાસ કેટલીક વૈશ્વિક શક્તિઓ પર નિર્ભર રહેવાને બદલે માનવતાની સેવા માટે હોવો જોઈએ. તેમણે હેલ્થકેરમાં 'નૈતિક AI' (Ethical AI) અપનાવવાની જરૂરિયાત પર ભાર મૂક્યો, જે દર્દીઓની ગોપનીયતા જાળવી રાખીને વૈજ્ઞાનિક શોધોને વેગ આપી શકે. આ સેન્ટર આગામી સમયમાં વિશ્વભર માટે સસ્તા અને ટેકનોલોજી-સભર સ્વાસ્થ્ય ઉકેલો પૂરા પાડવામાં ભારતની ભૂમિકાને વધુ મજબૂત બનાવશે.