નવી દિલ્હી : ભારતની રાષ્ટ્રીય તપાસ એજન્સી (NIA) એ દેશ વિરોધી પ્રવૃત્તિઓમાં સામેલ પ્રતિબંધિત સંગઠન પોપ્યુલર ફ્રન્ટ ઓફ ઈન્ડિયા (PFI) વિરુદ્ધ ચાલી રહેલી તપાસમાં એક મોટી સિદ્ધિ હાંસલ કરી છે. છેલ્લા ત્રણ વર્ષથી પોલીસ અને એજન્સીઓની નજરથી બચીને વિદેશમાં છુપાયેલા આરોપી મોઈદીનકુટ્ટી પી. ની કોચીન આંતરરાષ્ટ્રીય એરપોર્ટ પરથી ધરપકડ કરવામાં આવી છે. આરોપી જેવો દુબઈ (UAE) થી ભારત પરત ફર્યો, કે તરત જ પૂર્વ બાતમીના આધારે NIA એ તેને દબોચી લીધો હતો.
શારીરિક તાલીમની આડમાં હિંસક ટ્રેનિંગ
કેરળના મલપ્પુરમનો રહેવાસી મોઈદીનકુટ્ટી PFI ની 'ફિઝિકલ એજ્યુકેશન ટ્રેનિંગ'નો સંયોજક હતો. NIA ના જણાવ્યા મુજબ, તે યોગ અને શારીરિક કસરતના બહાને યુવાનોને હથિયારો ચલાવવાની તાલીમ આપતો હતો. સપ્ટેમ્બર ૨૦૨૨ માં જ્યારે PFI પર પ્રતિબંધ લાદવામાં આવ્યો અને તપાસ તેજ થઈ, ત્યારે તે ધરપકડના ડરથી દેશ છોડીને ભાગી ગયો હતો. તપાસ દરમિયાન તેના ઘરેથી અનેક વાંધાજનક ડિજિટલ પુરાવા અને દસ્તાવેજો મળી આવ્યા છે.
૨૦૪૭ સુધીનું ખતરનાક ષડયંત્ર
NIA ની તપાસમાં ચોંકાવનારો ખુલાસો થયો છે કે આ સંગઠનનો ઉદ્દેશ્ય ૨૦૪૭ સુધીમાં ભારતમાં ઇસ્લામિક શાસન સ્થાપિત કરવાનો હતો. આ માટે તેમણે અલગ-અલગ વિંગ બનાવી હતી:
•    રિપોર્ટર્સ વિંગ: માહિતી એકત્ર કરવા માટે.
•    આર્મ્સ ટ્રેનિંગ વિંગ: શસ્ત્રોની તાલીમ આપવા માટે.
•    સર્વિસ ટીમ્સ: હિંસક હુમલાઓ કરવા માટે.
મોઈદીનકુટ્ટી આ આખા માળખામાં યુવાનોને કટ્ટરપંથી બનાવવા અને તેમને હિંસા તરફ વાળવામાં મુખ્ય ભૂમિકા ભજવતો હતો.
૬૫ આરોપીઓ સામે ચાર્જશીટ
NIA અત્યાર સુધીમાં આ કેસમાં ૬૫ લોકો સામે ચાર્જશીટ દાખલ કરી ચૂકી છે. થોડા દિવસો પહેલા જ ૧૩ ફેબ્રુઆરીએ રામલિંગમ હત્યા કેસમાં સામેલ અન્ય એક આરોપી વિરુદ્ધ પણ કાર્યવાહી કરવામાં આવી હતી. એજન્સીનું કહેવું છે કે હજુ પણ ઘણા ફરાર આરોપીઓ રડાર પર છે અને તપાસ ચાલુ છે. મોઈદીનકુટ્ટીની ધરપકડ બાદ હવે વિદેશી ફંડિંગ અને સ્થાનિક નેટવર્ક વિશે વધુ મોટા ખુલાસા થવાની શક્યતા છે.