નવી દિલ્હી, તા. ૧૯: દેશમાં ચૂંટણીઓ ટાણે રાજકીય પક્ષો દ્વારા કરવામાં આવતા 'મફત ભેટ' (Freebies) ના વચનો પર આજે સુપ્રીમ કોર્ટે અત્યંત કડક વલણ અપનાવ્યું છે. મુખ્ય ન્યાયાધીશ (CJI) સૂર્યકાંતની આગેવાની હેઠળની બેન્ચે એક મહત્વપૂર્ણ સુનાવણી દરમિયાન સ્પષ્ટ શબ્દોમાં પૂછ્યું હતું કે, જો સરકારો આ રીતે જ તિજોરી ખાલી કરીને મફત ભેટો આપતી રહેશે, તો આર્થિક વિકાસ અને માળખાગત સુવિધાઓ માટે ભંડોળ ક્યાંથી આવશે?
રાજ્યોની વધતી મહેસૂલ ખાધ પર ચિંતા
CJI એ નોંધ્યું હતું કે, દેશના મોટાભાગના રાજ્યો હાલમાં ભારે દેવા અને મહેસૂલ ખાધનો સામનો કરી રહ્યા છે. આમ છતાં, વોટ મેળવવા માટે નવી નવી કલ્યાણકારી યોજનાઓ અને રોકડ ટ્રાન્સફરની જાહેરાતો કરવામાં આવી રહી છે. કોર્ટે પ્રશ્ન કર્યો કે, "મફત ખોરાક, સાયકલ અને વીજળી આપવી એ ઠીક છે, પણ આપણે હવે સીધા ખાતામાં રોકડ જમા કરવાના તબક્કે પહોંચ્યા છીએ. આનો અંત ક્યાં આવશે? આ નાણાકીય બોજ આખરે કોણ ઉઠાવશે?"
તમિલનાડુ સરકારને ઠપકો
આ સુનાવણી દરમિયાન સુપ્રીમ કોર્ટે ખાસ કરીને તમિલનાડુ સરકારના વલણ સામે નારાજગી વ્યક્ત કરી હતી. રાજ્ય સરકારે અમુક સમુદાયો માટે વીજળીના દરમાં સબસિડી જાહેર કરી હતી, જેને કારણે વીજ વિતરણ કંપનીઓ પર ભારે નાણાકીય દબાણ આવ્યું હતું. આ કંપનીઓએ સરકારના નિર્ણય વિરુદ્ધ કોર્ટના દ્વાર ખખડાવ્યા હતા. કોર્ટે કહ્યું કે આવી સબસિડીથી વિકાસના કામો અટકી જાય છે.
રોજગાર સર્જનને પ્રાથમિકતા આપવા સૂચન
સર્વોચ્ચ અદાલતે સરકારોને સલાહ આપી છે કે લોકોના ખિસ્સામાં મફતના પૈસા નાખવાને બદલે રોજગારની તકો ઊભી કરવા પર ધ્યાન કેન્દ્રિત કરવું જોઈએ. CJI એ કહ્યું કે, "સરકારે એવા લોકોની મદદ કરવી જોઈએ જેઓ શિક્ષણ કે સામાન્ય જીવન જીવી શકતા નથી, પરંતુ અત્યારે તો મફત ભેટો એવા લોકો સુધી પણ પહોંચી રહી છે જેઓ માત્ર તેનો આનંદ માણે છે."
ચૂંટણી પહેલા જ કેમ વચનો?
કોર્ટે એક અત્યંત પ્રસ્તુત પ્રશ્ન ઉઠાવ્યો કે બધી જ મોટી યોજનાઓ ચૂંટણીના થોડા સમય પહેલા જ કેમ જાહેર કરવામાં આવે છે? કોર્ટે તમામ રાજકીય પક્ષો અને સમાજશાસ્ત્રીઓને આ ગંભીર મુદ્દે પુનર્વિચાર કરવા અપીલ કરી છે. સુપ્રીમ કોર્ટની આ ટિપ્પણી બાદ હવે આગામી ચૂંટણીઓમાં મફત ભેટોના વચનો પર અંકુશ આવશે કે કેમ તે જોવું રહ્યું.