તરનતારન : પંજાબના તરનતારનમાં એક હસતા-રમતા લગ્ન સમારોહમાં જે રીતે AK-47 રાઇફલ ગુંજી, તેણે ૨૦૨૨ના સિદ્ધુ મૂસેવાલા હત્યાકાંડની કાળી યાદો તાજી કરી દીધી છે. શેર સિદ્ધુ ફાર્મ પેલેસમાં જ્યારે મહેમાનો લગ્નની મજા માણી રહ્યા હતા, ત્યારે અચાનક એસોલ્ટ રાઇફલ્સ અને 9mm પિસ્તોલ સાથે આવેલા બે હુમલાખોરોએ આમ આદમી પાર્ટી સાથે જોડાયેલા સરપંચ હરબિંદર સંધુ પર અંધાધૂંધ ગોળીબાર કર્યો હતો. આનંદની ચીસો સેકન્ડોમાં મરણચીસોમાં ફેરવાઈ ગઈ અને હરબિંદર સંધુ લોહીલુહાણ હાલતમાં જમીન પર ઢળી પડ્યા. આ હુમલામાં વચ્ચે પડનારા ગર્મન સિંહ નામના વ્યક્તિને પણ ગોળી વાગી હતી, જ્યારે સરપંચનું હોસ્પિટલ પહોંચતા પહેલા જ મોત નીપજ્યું હતું.

હત્યાના ગણતરીના કલાકોમાં જ કુખ્યાત 'લંડા હરિકે ગેંગ' એ સોશિયલ મીડિયા પર આ હત્યાની જવાબદારી સ્વીકારીને સનસનાટી મચાવી દીધી છે. ગેંગે પોસ્ટમાં લખ્યું કે, "આ તો ફક્ત ટ્રેલર છે," અને ખુલાસો કર્યો કે સરપંચે તેમના 'નાના ભાઈ' નોનીના કેસમાં પોલીસ સમક્ષ જુબાની આપી હતી, જેની સજા તેમને મોત તરીકે આપવામાં આવી છે. માઝા બેલ્ટમાં અત્યારે લંડા હરિકે, સટ્ટા નૌશેરા અને ગુરદેવ ગહેસલ જેવી ગેંગો વચ્ચે વર્ચસ્વની લડાઈ ચરમસીમાએ છે. ખંડણી અને બદલાની આ આગમાં છેલ્લા ત્રણ મહિનામાં આ ત્રીજી મોટી રાજકીય હત્યા છે, જેનાથી પંજાબની કાયદો અને વ્યવસ્થા પર ગંભીર પ્રશ્નો ઉભા થયા છે.

પોલીસ તપાસમાં બહાર આવ્યું છે કે આ હત્યાનું મૂળ ૨૦૨૪ના એક ખંડણીના કેસમાં છુપાયેલું છે. સુખવિંદર સિંહ ઉર્ફે નોનીએ જ્યારે એક વેપારી પાસેથી પૈસા પડાવ્યા હતા, ત્યારે હરબિંદર સંધુએ હિંમત બતાવીને સહ-ફરિયાદી તરીકે જુબાની આપી હતી. આ કાનૂની લડાઈ જ તેમની જિંદગીની છેલ્લી ભૂલ સાબિત થઈ. હાલમાં સમગ્ર વિસ્તારમાં પોલીસ છાવણી ફેરવાઈ ગયો છે અને ડોલી બાલ ગેંગની સક્રિયતાના અહેવાલોએ સુરક્ષા એજન્સીઓની ચિંતામાં વધારો કર્યો છે. પંજાબમાં જે રીતે સંગઠિત ગુનેગારો પાસે AK-47 જેવા આધુનિક શસ્ત્રો પહોંચી રહ્યા છે, તે જોતા સરહદી રાજ્યની સુરક્ષા સામે મોટો ખતરો ઉભો થયો છે.