ખારગોન : મધ્યપ્રદેશની ખારગોન પોલીસે નશીલા પદાર્થોના વેપાર સામે યુદ્ધ છેડતા 'ઓપરેશન પ્રહાર' હેઠળ એક અત્યંત મોટી અને સફળ કાર્યવાહી પાર પાડી છે. મહારાષ્ટ્રની સરહદને અડીને આવેલા દુર્ગમ પહાડી વિસ્તારોમાં ચાલતી ગાંજાની ખેતીનો પર્દાફાશ કરીને પોલીસે અંદાજે ₹1.49 કરોડની કિંમતનો જથ્થો જપ્ત કર્યો છે.
નેટવર્ક વગરના વિસ્તારમાં પોલીસની 'એર સ્ટ્રાઈક'
ખારગોન પોલીસ અધિક્ષક રવિન્દ્ર વર્માએ પત્રકાર પરિષદમાં જણાવ્યું હતું કે, આ કાર્યવાહી ચૈનપુર પોલીસ સ્ટેશન હેઠળના સેન્દ્રિયાઘાટી અને તિખલી બાડી જેવા અંતરિયાળ વિસ્તારોમાં કરવામાં આવી હતી. આ એવો 'શેડો એરિયા' છે જ્યાં મોબાઈલ નેટવર્ક પણ કામ કરતું નથી. ગુનેગારોને એમ હતું કે આ દુર્ગમ પહાડોમાં તેમની કાળી કરતૂતો કોઈના ધ્યાને નહીં આવે, પરંતુ પોલીસે ગુપ્ત બાતમીના આધારે દરોડા પાડીને 5,900 જેટલા ગાંજાના છોડ શોધી કાઢ્યા હતા.
ખેતરની આડમાં નશાનો કારોબાર
પોલીસના જણાવ્યા અનુસાર, સામાન્ય પાકની આડમાં આ પ્રતિબંધિત છોડ ઉગાડવામાં આવતા હતા. જપ્ત કરાયેલા ગાંજાના છોડનું વજન અને ગુણવત્તા જોતા તેની આંતરરાષ્ટ્રીય બજારમાં કિંમત કરોડોમાં અંકાય છે. આ મામલે પોલીસે ખેતી કરનારા બે શંકાસ્પદ ખેડૂતોની ધરપકડ કરી છે અને તેમની પૂછપરછમાં ડ્રગ્સ માફિયાઓના મોટા નેટવર્કનો ખુલાસો થવાની શક્યતા છે.
સરહદી વિસ્તારોમાં એલર્ટ
મહારાષ્ટ્ર અને મધ્યપ્રદેશની સરહદ હોવાથી આ વિસ્તાર નશાના સોદાગરો માટે સુરક્ષિત માનવામાં આવતો હતો. જોકે, ખારગોન પોલીસે 'ઓપરેશન પ્રહાર' તેજ કરીને સ્પષ્ટ સંકેત આપ્યો છે કે ડ્રગ્સના દુરુપયોગ કે ખેતીને કોઈ પણ સંજોગોમાં ચલાવી લેવામાં આવશે નહીં. પોલીસ હવે એ પણ તપાસી રહી છે કે આ માલ ક્યાં સપ્લાય થવાનો હતો.
ખારગોન પોલીસની આ કામગીરીથી સમગ્ર રાજ્યમાં ડ્રગ્સ માફિયાઓમાં ફફડાટ વ્યાપી ગયો છે.