પટણા:બિહારના રાજકારણમાં 'લેન્ડ ફોર જોબ' (નોકરી માટે જમીન) કૌભાંડનો મામલો ફરી એકવાર ગરમાયો છે. રાષ્ટ્રીય જનતા દળના પ્રમુખ લાલુ પ્રસાદ યાદવના મોટા પુત્ર અને બિહારના પૂર્વ મંત્રી તેજ પ્રતાપ યાદવ આજે દિલ્હીની રાઉઝ એવન્યુ કોર્ટમાં હાજર થયા હતા. આ કૌભાંડમાં તેજ પ્રતાપ સામે આરોપો ઘડવા અંગેની પ્રક્રિયા શરૂ થતા લાલુ પરિવારની રાજકીય અને કાયદાકીય ચિંતાઓમાં વધારો થયો છે.
આ મામલો એ સમયનો છે જ્યારે લાલુ પ્રસાદ યાદવ કેન્દ્ર સરકારમાં રેલવે મંત્રી હતા. એવો ગંભીર આરોપ છે કે રેલવેમાં ગ્રુપ-ડીની નોકરીઓ આપવાના બદલામાં અનેક ઉમેદવારો પાસેથી લિખિતમાં જમીન લખાવી લેવામાં આવી હતી. આ જમીનો લાલુ પરિવારના સભ્યો અથવા તેમની માલિકીની કંપનીઓના નામે ટ્રાન્સફર કરવામાં આવી હતી. CBI ના મતે, આ એક સુનિયોજિત રીતે આચરવામાં આવેલું ભ્રષ્ટાચારનું કૌભાંડ છે.
 સવારે તેજ પ્રતાપ યાદવ ચુસ્ત સુરક્ષા વચ્ચે કોર્ટ રૂમમાં પહોંચ્યા હતા. અગાઉ લાલુ પ્રસાદ યાદવ અને પૂર્વ મુખ્યમંત્રી રાબડી દેવી પણ આ જ કેસમાં કોર્ટમાં હાજર રહી ચૂક્યા છે. જો આજે કોર્ટ દ્વારા આરોપો ઘડવામાં આવશે, તો આ કેસની ટ્રાયલ (નિયમિત સુનાવણી) શરૂ થશે. CBI એ આ કેસમાં તેજસ્વી યાદવ સહિત પરિવારના અન્ય સભ્યોને પણ આરોપી તરીકે નામિત કર્યા છે.
બિહારમાં ૨૦૨૬ના અંતમાં વિધાનસભા ચૂંટણીના ભણકારા વાગી રહ્યા છે ત્યારે લાલુ પરિવારના સભ્યોનું કોર્ટમાં ચક્કર લગાવવું વિપક્ષી પાર્ટીઓ માટે હુમલો કરવાનું હથિયાર બની ગયું છે. બીજી તરફ, RJD આ કાર્યવાહીને રાજકીય કિન્નાખોરી ગણાવી રહી છે. જો કે, કોર્ટની આ કાર્યવાહી તેજ પ્રતાપ યાદવની રાજકીય કારકિર્દી પર સીધી અસર કરી શકે છે. નોંધનીય છે કે, રાઉઝ એવન્યુ કોર્ટમાં ચાલી રહેલી આ સુનાવણી પર સમગ્ર દેશની નજર છે, કારણ કે આ કેસમાં બિહારના એક શક્તિશાળી રાજકીય પરિવારનું ભવિષ્ય દાવ પર લાગ્યું છે.