વોશિંગ્ટન: વિશ્વ અત્યારે વધુ એક ભયાનક યુદ્ધના ઉંબરે આવીને ઉભું હોય તેમ જણાય છે. અમેરિકામાં ડોનાલ્ડ ટ્રમ્પના સત્તા સંભાળ્યા બાદ મધ્ય-પૂર્વમાં સ્થિતિ અત્યંત સ્ફોટક બની ગઈ છે. અમેરિકાએ ઈરાનની સરહદો પાસે અચાનક પોતાના સૈન્યમાં મોટો વધારો કર્યો છે, જેનાથી સ્પષ્ટ સંકેત મળી રહ્યા છે કે અમેરિકા ગમે ત્યારે ઈરાન પર સીધો અને ભીષણ હુમલો કરી શકે છે.
સંરક્ષણ નિષ્ણાતોના મતે, અમેરિકાએ ઈરાનની આસપાસના વિસ્તારોમાં ૧૫૦થી વધુ અત્યાધુનિક ફાઈટર જેટ, ૧૨ વિશાળ એરક્રાફ્ટ કેરિયર અને અનેક વિનાશક યુદ્ધજહાજો તૈનાત કરી દીધા છે. આટલું જ નહીં, હવામાં જ ઈંધણ ભરી શકે તેવા ટેન્કર વિમાનોને પણ એલર્ટ પર રાખવામાં આવ્યા છે, જેથી ઈરાનના અણુ મથકો સુધી લાંબા અંતરના હુમલા કરી શકાય. ખાસ કરીને 'સ્ટ્રેટ ઓફ હોર્મુઝ' પાસે અમેરિકાની હિલચાલ વધી છે.
 અમેરિકાના આ આક્રમક વલણ સામે રશિયા અને ચીન હવે ખુલ્લેઆમ ઈરાનના સમર્થનમાં આવી ગયા છે. રશિયન પ્રમુખ વ્લાદિમીર પુતિને પોતાના યુદ્ધજહાજોને આ વિસ્તારમાં રવાના કરીને અમેરિકાને સીધી ચેતવણી આપી છે. ચીને પણ ઈરાન સાથેના પોતાના આર્થિક અને સામરિક હિતોને જોતા અમેરિકાના આ પગલાનો વિરોધ કર્યો છે. આ ત્રણેય મહાસત્તાઓના આમને-સામને આવવાથી વૈશ્વિક શાંતિ જોખમમાં મુકાઈ છે.
દુનિયાનું ધ્યાન ત્યારે વધુ ખેંચાયું જ્યારે ઈરાનમાં ભૂકંપના તેજ આંચકા અનુભવાયા. સોશિયલ મીડિયા અને કેટલાક આંતરરાષ્ટ્રીય માધ્યમોમાં એવી અટકળો વહેતી થઈ છે કે શું ઈરાને ગુપ્ત રીતે પરમાણુ પરીક્ષણ કર્યું છે? જોકે, સત્તાવાર રીતે આ માત્ર કુદરતી ભૂકંપ હોવાનું કહેવાય છે, પરંતુ યુદ્ધના વાતાવરણમાં આ ઘટનાએ પણ દહેશત વધારી દીધી છે.
 ડોનાલ્ડ ટ્રમ્પ શરૂઆતથી જ ઈરાન પ્રત્યે સખત વલણ ધરાવે છે. હોર્મુઝની સામુદ્રધુની પાસે ડ્રિલિંગ અને સૈન્ય પ્રવૃત્તિઓ વધારીને ટ્રમ્પ ઈરાનની આર્થિક કરોડરજ્જુ ગણાતા તેલના નિકાસ માર્ગને રોકવાની રણનીતિ અપનાવી રહ્યા છે. જો સ્થિતિ વધુ વણસે, તો વૈશ્વિક સ્તરે ક્રૂડ ઓઈલના ભાવમાં મોટો ઉછાળો આવી શકે છે અને ભારત સહિતના દેશોની અર્થવ્યવસ્થા પર તેની માઠી અસર પડી શકે છે