બેંગલુરુ:ડિજિટલ પેમેન્ટની દુનિયામાં ક્રાંતિ લાવનાર PhonePe એ પોતાના કરોડો વપરાશકર્તાઓ માટે એક ધમાકેદાર ભેટ આપી છે. હવે ગીચ બજારમાં ઉભા રહીને કે ઉતાવળમાં પેમેન્ટ કરતી વખતે તમારે 4 કે 6 આંકડાનો UPI પિન યાદ રાખવાની કે ટાઈપ કરવાની જરૂર નહીં પડે. કંપનીએ સુરક્ષા અને સ્પીડનો સમન્વય સાધીને 'બાયોમેટ્રિક ઓથેન્ટિકેશન' ફીચર લોન્ચ કર્યું છે, જે તમારા સ્માર્ટફોનના ફિંગરપ્રિન્ટ અથવા ફેસ આઈડી પર કામ કરશે.
 કંપનીના જણાવ્યા અનુસાર, આ નવી સુવિધા હેઠળ યુઝર્સ ₹5,000 સુધીની ચુકવણી માત્ર એક સેકન્ડમાં કરી શકશે. અત્યાર સુધી પિન દાખલ કરવામાં જે સમય જતો હતો અને પાછળ ઉભેલી વ્યક્તિ પિન જોઈ જશે તેવો જે ડર રહેતો હતો, તે હવે ભૂતકાળ બની જશે. હાલમાં આ સુવિધા Android યુઝર્સ માટે રોલ-આઉટ કરવામાં આવી છે, જ્યારે iOS (iPhone) યુઝર્સે આ સુવિધા માટે થોડી રાહ જોવી પડશે.
 PhonePe એ સ્પષ્ટ કર્યું છે કે આ સુવિધા 'ડિવાઇસ-લેવલ વેરિફિકેશન' પર આધારિત છે. એટલે કે, જે રીતે તમે તમારો ફોન અનલોક કરો છો, તે જ સુરક્ષા સ્તર હવે તમારા પેમેન્ટને પણ પ્રોટેક્ટ કરશે. પિન લીક થવાનો કે અન્ય કોઈ વ્યક્તિ દ્વારા પિન જોઈ લેવાનો ખતરો હવે શૂન્ય થઈ જશે. મિત્રોને પૈસા મોકલવા હોય, QR કોડ સ્કેન કરવો હોય કે ઓનલાઈન શોપિંગ કરવું હોય, બધું જ હવે તમારી આંગળીના ટેરવે હશે.
 જો તમે પણ પિન વગર પેમેન્ટ કરવા માંગો છો, તો નીચેના સ્ટેપ્સ ફોલો કરો:
• સૌ પ્રથમ તમારી PhonePe એપ અપડેટ કરો અને પ્રોફાઇલ આઇકોન પર ક્લિક કરો.
• ત્યારબાદ 'Manage Payments' ના ઓપ્શનમાં જાઓ.
• ત્યાં તમને 'Biometric Pay' નો વિકલ્પ દેખાશે, તેના પર ક્લિક કરો.
• તમારા બેંક એકાઉન્ટ માટે આ સુવિધા ઓન કરો અને એકવાર પિન નાખીને સેટઅપ પૂરું કરો.
બસ, હવે પછીના તમામ નાના-મોટા પેમેન્ટ માટે ફોન ફક્ત ફિંગરપ્રિન્ટ માંગશે અને તમારું કામ ચપટી વગાડતા થઈ જશે!