સિલચર : કેન્દ્રીય ગૃહમંત્રી અમિતભાઈ શાહ આજે રાત્રે આસામના ત્રણ દિવસના મહત્વપૂર્ણ પ્રવાસે આવી પહોંચશે. તેમનો આ પ્રવાસ વ્યૂહાત્મક, વહીવટી અને રાજકીય દૃષ્ટિએ અત્યંત મહત્વનો માનવામાં આવી રહ્યો છે. આજે મોડી રાત્રે તેઓ કછર જિલ્લાના સિલચર ખાતે ઉતરાણ કરશે, જ્યાંથી તેમના કાર્યક્રમોનો ધમધમાટ શરૂ થશે.
સરહદ સુરક્ષા અને વાઇબ્રન્ટ વિલેજ પ્રોગ્રામ
આવતીકાલે સવારે અમિતભાઈ શાહ ભારત-બાંગ્લાદેશ સરહદ પર સ્થિત બીએસએફ (BSF) ની નટુનપુર બોર્ડર આઉટપોસ્ટની મુલાકાત લેશે. અહીં તેઓ સરહદી સુરક્ષાની વર્તમાન પરિસ્થિતિની સમીક્ષા કરશે. ખાસ કરીને, સરહદ પર માળખાગત સુવિધાઓ વધારવા અને સરહદી ગામડાઓના વિકાસ માટે તેઓ 'વાઇબ્રન્ટ વિલેજ પ્રોગ્રામ'નું ઉદ્ઘાટન કરશે. આ પહેલનો હેતુ સીમાવર્તી વિસ્તારોમાં આજીવિકાના સાધનો વધારવાનો અને પલાયન રોકવાનો છે.
બરાક ખીણથી રાજકીય ગરમાવો
સુરક્ષા સમીક્ષા બાદ, અમિતભાઈ શાહ બરાક ખીણમાં ભારતીય જનતા પાર્ટીની એક વિશાળ જનસભાને સંબોધિત કરશે. આ રેલી દ્વારા તેઓ આગામી ચૂંટણીઓ માટેના પ્રચારના શ્રીગણેશ કરશે. બરાક ખીણનો આ વિસ્તાર ભાજપ માટે રાજકીય રીતે ઘણો મહત્વનો છે. ત્યારબાદ તેઓ પાડોશી રાજ્ય ત્રિપુરાના અગરતલાની મુલાકાત લઈને ફરી આસામ પરત ફરશે.
CRPF પરેડ અને પોલીસ કેમ્પસનો શિલાન્યાસ
શનિવારે ગૃહમંત્રી ગુવાહાટીના અર્જુન ભોગેશ્વર બરુઆહ સ્પોર્ટ્સ કોમ્પ્લેક્સ ખાતે આયોજિત સીઆરપીએફ (CRPF) ના વાર્ષિક ડે પરેડમાં મુખ્ય અતિથિ તરીકે હાજરી આપશે. સૈન્યના જવાનોનું મનોબળ વધાર્યા બાદ, તેઓ સોનાપુરના કાસુટોલી ખાતે ૧૦મી આસામ પોલીસ બટાલિયનના અત્યાધુનિક નવા કેમ્પસનો શિલાન્યાસ કરશે.
અમિતભાઈ શાહના આ પ્રવાસથી આસામમાં સુરક્ષા વ્યવસ્થા વધુ મજબૂત બનવાની સાથે સાથે વિકાસના નવા કાર્યોને પણ વેગ મળશે.