નવી દિલ્હી:ભારતીય સંસદના ઉપલા ગૃહ એટલે કે રાજ્યસભામાં સત્તાના સમીકરણો ફરી એકવાર બદલાવા જઈ રહ્યા છે. ચૂંટણી પંચે 10 રાજ્યોની કુલ 37 બેઠકો માટે ચૂંટણી કાર્યક્રમ જાહેર કર્યો છે. આગામી 16 માર્ચે મતદાન અને તે જ દિવસે પરિણામ જાહેર કરવામાં આવશે. આ ચૂંટણી એટલા માટે મહત્વની છે કારણ કે તેનાથી કેન્દ્રમાં સત્તારૂઢ NDA અને વિપક્ષી ગઠબંધન 'INDIA' વચ્ચેની સંખ્યાબળની ખેંચતાણ નિર્ણાયક મોડ પર પહોંચશે.
તાજેતરની વિધાનસભા ચૂંટણીઓના પરિણામો હવે રાજ્યસભામાં પ્રતિબિંબિત થશે. મહારાષ્ટ્રની સૌથી વધુ 7 બેઠકો ખાલી થઈ રહી છે, જ્યાં સત્તાધારી મહાયુતિ ગઠબંધન 6 બેઠકો જીતે તેવી પ્રબળ શક્યતા છે. બીજી તરફ બિહારમાં લાલુ પ્રસાદ યાદવની RJD માટે ખતરો છે; વિધાનસભ્યોની ઓછી સંખ્યાને કારણે તેઓ પોતાની બંને બેઠકો ગુમાવી શકે છે, જે સીધો ફાયદો NDAને કરાવી શકે છે.
રાજકીય ગણિત મુજબ, ભાજપની બેઠકો 15 થી વધીને 18 સુધી પહોંચી શકે છે. હાલમાં 245 સભ્યોના ગૃહમાં NDA પાસે 133 સાંસદો છે. જો ભાજપ પોતાની તાકાત વધારે છે, તો ભવિષ્યમાં મહત્વના બિલો પાસ કરાવવા સરકાર માટે વધુ સરળ બનશે. બંગાળમાં મમતા બેનર્જીની TMC 4 બેઠકો જાળવી શકે છે, પરંતુ ત્યાં પણ ભાજપ એક બેઠક આંચકી લેવાની પૂરતી તૈયારીમાં છે.
કયા રાજ્યમાં કેવી છે સ્થિતિ?
• તમિલનાડુ: 6 બેઠકોમાંથી DMK 4 બેઠકો જીતીને પોતાનો ગઢ સાચવી શકે છે.
• આસામ: ભાજપ અહીં ક્લીન સ્વીપ કરીને ત્રણેય બેઠકો કબજે કરી શકે છે.
• તેલંગાણા અને છત્તીસગઢ: કોંગ્રેસ આ રાજ્યોમાં પોતાની પકડ મજબૂત રાખવા પ્રયાસ કરશે, જ્યાંથી તેને કુલ 4 બેઠકો મળવાની આશા છે.
 આ 37 બેઠકો તો માત્ર ટ્રેલર છે, કારણ કે 2026ના અંત સુધીમાં કુલ 72 થી 75 બેઠકો ખાલી થવાની છે. ઓડિશા, હરિયાણા અને હિમાચલ પ્રદેશ જેવા રાજ્યોમાં ભાજપની મજબૂત સ્થિતિ તેને રાજ્યસભામાં 'સુપર પાવર' બનાવવાની દિશામાં આગળ વધારી રહી છે. વિપક્ષી ગઠબંધન માટે હવે પોતાના અસ્તિત્વ અને પ્રભાવને ટકાવી રાખવાનો આ મોટો પડકાર છે