નવી દિલ્‍હી તા.૨૦: જાહેર ક્ષેત્રની બેંકોના શેરમાં આજે પણ તેજી ચાલુ છે. છેલ્‍લા છ મહિનામાં, દેશની ૧૨ જાહેર ક્ષેત્રની બેંકોનું માર્કેટ કેપ રૂા.૫.૭૫ લાખ કરોડ વધીને રૂા.૨૧.૩૫ લાખ કરોડ થયું છે. આ સમયગાળા દરમિયાન, નિફટી ભ્‍લ્‍શ્‍ બેંક ઇન્‍ડેક્‍સમાં લગભગ ૩૪ ટકાનો વધારો થયો છે, જ્‍યારે નિફટી પ્રાઇવેટ બેંક ઇન્‍ડેક્‍સમાં માત્ર ૭ ટકાનો જ વળતર મળ્‍યું છે. ક્રેડિટ વૃદ્ધિ, ખરાબ લોનમાં ઘટાડો અને રેકોર્ડ નફાને કારણે જાહેર ક્ષેત્રની બેંકોના શેરમાં વધારો થયો છે.

બેંક ઓફ ઇન્‍ડિયામાં છેલ્‍લા છ મહિનામાં સૌથી મોટો વધારો જોવા મળ્‍યો છે, જેનો શેર ૫૦ ટકા વધ્‍યો છે. આ સમયગાળા દરમિયાન, દેશની સૌથી મોટી જાહેર ક્ષેત્રની બેંક SBI ના શેરમાં ૪૭% નો વધારો થયો છે. છેલ્‍લા છ મહિનામાં યુનિયન બેંકના શેરમાં ૪૨% નો વધારો થયો છે, જ્‍યારે કેનેરા બેંક, ઇન્‍ડિયન બેંક, બેંક ઓફ મહારાષ્ટ્ર, બેંક ઓફ બરોડા અને PNB માં ૨૦% થી ૩૯% નો વધારો થયો છે.

પ્રશ્ન એ છે કે જાહેર ક્ષેત્રની બેંકના શેરમાં આ તેજી કેટલા સમય સુધી ચાલુ રહેશે? આનો જવાબ આપવા માટે, તમારે આ બેંકોની ક્રેડિટ ગ્રોથ સ્‍ટોરી સમજવાની જરૂર છે, જેના કારણે તેમના શેરમાં ઉછાળો આવ્‍યો છે. ત્રીજા ક્‍વાર્ટરમાં, જાહેર ક્ષેત્રની બેંક લોન ગ્રોથ ગયા વર્ષની સરખામણીમાં ૧૪.૫% થી વધુ વધી છે. સૌથી વધુ માંગ SME અને રિટેલ ધિરાણ માટે હતી. આ સમયગાળા દરમિયાન, ખાનગી ક્ષેત્રની લોન ગ્રોથ ૧૨% ની નીચે રહી. ત્રિમાસિક ધોરણે, જાહેર ક્ષેત્રની બેંક લોન ગ્રોથ ૫.૫% વધી છે, જ્‍યારે ખાનગી ક્ષેત્રની બેંકો માટે તે ૩.૫% હતી.

SBI એ તેના ક્રેડિટ ગ્રોથ ગાઇડન્‍સને ૧૩-૧૫% સુધી વધારી દીધું છે. આ બેંક ઓફ મહારાષ્ટ્ર માટે ૨૦%, યુકો બેંક માટે ૧૬.૭૪% અને ઇન્‍ડિયન ઓવરસીઝ બેંક માટે ૨૪.૧૩% છે. જિયોજીત ઇન્‍વેસ્‍ટમેન્‍ટ્‍સના રિસર્ચ હેડ વિનોદ નાયરે જણાવ્‍યું હતું કે છેલ્‍લા બે ક્‍વાર્ટરમાં ક્રેડિટ ગ્રોથના સંદર્ભમાં જાહેર ક્ષેત્રની બેંકોએ ખાનગી ક્ષેત્રની બેંકો કરતાં વધુ સારો દેખાવ કર્યો છે. મોટાભાગની જાહેર ક્ષેત્રની બેંકોએ ૨૦૨૬ અને ૨૦૨૭ માટે તેમના ક્રેડિટ ગ્રોથના અંદાજમાં વધારો કર્યો છે. આને પર્યાપ્ત મૂડી બફર અને મજબૂત ક્રેડિટ-ટુ-ડિપોઝિટ રેશિયો દ્વારા સમર્થન આપવામાં આવ્‍યું છે.(૩૮.૩૩)