બેલાગવી: તા.20: કર્ણાટકના બેલાગવી જેવા નાના શહેરમાંથી વૈશ્વિક ટેકનોલોજીને ટક્કર આપતો એક કિસ્સો સામે આવ્યો છે. અહીંના એક પ્રતિભાશાળી સોફ્ટવેર એન્જિનિયર, મોહમ્મદ અય્યાઝ મુલ્લાએ સાન ફ્રાન્સિસ્કો સ્થિત વિશ્વ વિખ્યાત આર્ટિફિશિયલ ઇન્ટેલિજન્સ (AI) કંપની 'એન્થ્રોપિક PBC' (Anthropic PBC) સામે કાનૂની યુદ્ધ શરૂ કર્યું છે. વિવાદનું મુખ્ય કારણ બંને કંપનીઓનું એકસરખું નામ છે, જેના કારણે સ્થાનિક સ્ટાર્ટઅપના વ્યવસાય પર માઠી અસર પડી રહી છે.
કોણ છે અસલી 'એન્થ્રોપિક'?
તમને જણાવી દઈએ કે, અમેરિકાની એન્થ્રોપિક કંપનીની સ્થાપના 2021માં ઓપનએઆઈના પૂર્વ સભ્યો ડારિયો અને ડેનિએલા અમોદેઈ દ્વારા કરવામાં આવી હતી. પરંતુ, આ જાયન્ટ કંપનીના અસ્તિત્વમાં આવ્યાના વર્ષો પહેલા, 2017માં મોહમ્મદ અય્યાઝ મુલ્લાએ કર્ણાટકમાં 'એન્થ્રોપિક સોફ્ટવેર પ્રાઇવેટ લિમિટેડ' ની સ્થાપના કરી દીધી હતી. મુલ્લા પાસે ઇન્ટેલ અને સિમેન્ટેક જેવી મોટી કંપનીઓમાં કામ કરવાનો 20 વર્ષનો બહોળો અનુભવ છે અને તેમની કંપની વાહનોની સુરક્ષા, શિક્ષણ અને AI એજન્ટ ઓર્કેસ્ટ્રેશન જેવા ગંભીર ક્ષેત્રોમાં કાર્યરત છે.
વિવાદ ક્યાંથી શરૂ થયો?
જ્યારે અમેરિકન કંપનીએ બેંગલુરુમાં પોતાની ઓફિસ ખોલવાની જાહેરાત કરી, ત્યારે મૂંઝવણ ઉભી થઈ.
•    ટ્રાફિક ડાયવર્ઝન: સર્ચ એન્જિન પર 'Anthropic' લખતા જ હવે સ્થાનિક કંપનીને બદલે યુએસ જાયન્ટની વિગતો દેખાવા લાગી છે.
•    ગ્રાહકોમાં ગેરસમજ: લાખો વિદ્યાર્થીઓ અને હજારો શૈક્ષણિક સંસ્થાઓ સાથે જોડાયેલા મુલ્લાના ગ્રાહકો હવે મૂંઝવણમાં છે કે અસલી બ્રાન્ડ કઈ?
•    વ્યવસાયિક નુકસાન: ઓનલાઈન ઓળખ હડપાઈ જવાથી બેલાગવી સ્થિત સ્ટાર્ટઅપની બ્રાન્ડ વેલ્યુ જોખમાઈ છે.
"અમે 2017થી 'એન્થ્રોપિક' નામનો ઉપયોગ કરીએ છીએ. અમે સ્ટાર્ટઅપ ઇન્ડિયા રજિસ્ટર્ડ કંપની છીએ અને અમારી પાસે ત્રણ પેટન્ટ પણ છે. જ્યારે 2025ના અંતમાં ગ્રાહકોમાં મૂંઝવણ વધવા લાગી, ત્યારે અમારી પાસે કાનૂની રસ્તો અપનાવવા સિવાય કોઈ વિકલ્પ નહોતો," તેમ અય્યાઝ મુલ્લાએ જણાવ્યું હતું.
કોર્ટની કાર્યવાહી
આ વિવાદ હવે કોર્ટના ઉંબરે પહોંચ્યો છે. યુએસ સ્થિત એન્થ્રોપિકે 16 ફેબ્રુઆરીએ બેંગલુરુમાં ઓફિસ તો શરૂ કરી દીધી, પરંતુ તે જ દિવસે કોર્ટમાં હાજર રહેવાનું ટાળ્યું હતું. પરિણામે, કોર્ટે કડક વલણ અપનાવીને હવે 9 માર્ચ, 2026 ના રોજ અમેરિકન કંપનીના પ્રતિનિધિઓને હાજર થવા માટે સમન્સ જારી કર્યું છે.
હવે જોવાનું એ રહેશે કે $380 બિલિયનની વૈશ્વિક કંપની ભારતની એક નાની પણ મજબૂત પાયો ધરાવતી કંપની સાથે આ ટ્રેડમાર્ક વિવાદમાં કેવી રીતે સમાધાન કરે છે અથવા કાનૂની લડાઈ શું વળાંક લે છે.