જકાર્તા:: અમેરિકા અને ઇન્ડોનેશિયા વચ્ચે એક અભૂતપૂર્વ વેપાર કરારને અંતિમ સ્વરૂપ આપવામાં આવ્યું છે, જે મધ્ય-પૂર્વની રાજનીતિ અને વૈશ્વિક બજાર બંનેને હચમચાવી દેશે. વ્હાઇટ હાઉસે જાહેરાત કરી છે કે વિશ્વનો સૌથી મોટો મુસ્લિમ બહુમતી ધરાવતો દેશ, ઇન્ડોનેશિયા, હવે લગભગ તમામ (૯૯%) અમેરિકન માલસામાન પરની આયાત ડ્યુટી (ટેરિફ) નાબૂદ કરશે. બદલામાં, અમેરિકા ઇન્ડોનેશિયન માલ પર ૧૯% ટેરિફ જાળવી રાખશે, જે કંબોડિયા અને મલેશિયાના સમાન સ્તરે છે.
વેપાર સાથે શાંતિની 'ડીલ'
આ કરાર માત્ર આર્થિક નથી, પરંતુ વ્યૂહાત્મક પણ છે. રાષ્ટ્રપતિ ટ્રમ્પના 'શાંતિ બોર્ડ' (Board of Peace) ની બેઠકમાં ઇન્ડોનેશિયાના રાષ્ટ્રપતિ પ્રબોવો સુબિયાન્ટોએ હાજરી આપી હતી.
•    લશ્કરી સહયોગ: ઇન્ડોનેશિયાએ યુદ્ધગ્રસ્ત ગાઝા પટ્ટીમાં શાંતિ સ્થાપવા માટે ૮,૦૦૦ સૈનિકો મોકલવાની પ્રતિબદ્ધતા દર્શાવી છે. ટ્રમ્પે આ સાહસિક નિર્ણય માટે પ્રબોવોની મુક્તકંઠે પ્રશંસા કરી હતી.
•    જંગી ખરીદી: ઇન્ડોનેશિયન કંપનીઓએ આ અઠવાડિયે જ અમેરિકા પાસેથી ૧૦ લાખ ટન સોયાબીન, ૧૬ લાખ ટન મકાઈ અને ૨૦૩૦ સુધીમાં ૫૦ લાખ ટન ઘઉં ખરીદવાનું વચન આપ્યું છે.
તાંબુ અને નિકલ: ભવિષ્યની ટેકનોલોજી પર કબજો
આ સોદા પાછળ ખનીજ સંસાધનોનું મોટું ગણિત છુપાયેલું છે. ઇન્ડોનેશિયા વિશ્વનો ત્રીજો સૌથી મોટો તાંબા (Copper) નો નિકાસકાર છે અને નિકલ (Nickel) નો સૌથી મોટો ભંડાર ધરાવે છે.
•    ઉદ્યોગમાં ઉપયોગ: તાંબુ ઇલેક્ટ્રિકલ વાયરિંગ માટે અનિવાર્ય છે, જ્યારે નિકલ સ્ટીલને મજબૂત બનાવવા અને ઇલેક્ટ્રિક વ્હિકલ (EV) ની બેટરી બનાવવા માટે અતિ મહત્વનું છે. ટ્રમ્પે સ્પષ્ટ કર્યું છે કે અમેરિકા ઇન્ડોનેશિયાના આ ઉચ્ચ ગુણવત્તાવાળા ખનીજોનો બહોળો ઉપયોગ કરશે.
ટેરિફની તલવાર અને સમાધાન
ગયા જુલાઈમાં ટ્રમ્પે ચેતવણી આપી હતી કે જો સમજૂતી નહીં થાય તો ઇન્ડોનેશિયા પર ૩૨% જેટલો ભારે ટેરિફ લાદવામાં આવશે. આ દબાણ કામ કરી ગયું અને જકાર્તા વાટાઘાટોની ટેબલ પર આવ્યું. ઇન્ડોનેશિયા જેની વસ્તી ૨૯ કરોડ છે, તે મુખ્યત્વે પામ તેલ, મસાલા, કાપડ અને સ્માર્ટફોનની નિકાસ કરે છે.
રાષ્ટ્રપતિ પ્રબોવોએ ટ્રમ્પના નેતૃત્વમાં વિશ્વાસ વ્યક્ત કરતા કહ્યું કે, "વાસ્તવિક શાંતિનું વિઝન હવે સાકાર થશે." આ કરારથી દક્ષિણ-પૂર્વ એશિયામાં ચીનનું વર્ચસ્વ ઘટશે અને અમેરિકાની પકડ વધુ મજબૂત બનશે તેમ માનવામાં આવે છે.