સુપ્રીમના કેટલાક સભ્યોથી શરમ અનુભવું છું: ટ્રમ્પ
અમેરિકાના ન્યાયતંત્રમાં ભૂકંપ : પ્રમુખ ટ્રમ્પ સુપ્રીમ કોર્ટના ન્યાયાધીશો પર તૂટી પડયા : ટેરિફ મુદ્દે ન્યાયાધીશોની નિષ્ઠા સામે ઉઠાવ્યા સવાલ : લોકશાહીને બચાવવા માટે અબ્રાહમ લિકનની જેમ કઠોર નિર્ણયો લેવાની ટ્રમ્પની તૈયારી
વોશિગ્ટન : અમેરિકાના પ્રમુખ ડોનાલ્ડ ટ્રમ્પે સુપ્રીમ કોર્ટના તાજેતરના એક ચુકાદા સામે ભારે આક્રોશ વ્યક્ત કર્યો છે. ટેરિફ એટલે કે આયાત શુલ્કને લગતા એક મહત્વપૂર્ણ કેસમાં સુપ્રીમ કોર્ટ દ્વારા તેમની વિરુદ્ધમાં નિર્ણય આપવામાં આવતા ટ્રમ્પે જાહેર મંચ પરથી કોર્ટના કેટલાક સભ્યોની ટીકા કરી છે. ટ્રમ્પે જણાવ્યું હતું કે તેઓ સુપ્રીમ કોર્ટના અમુક સભ્યોથી શરમ અનુભવે છે કારણ કે તેમનામાં ટેરિફને સમર્થન આપવાની હિમત નથી.
આ વિવાદ ત્યારે વકર્યો જ્યારે સુપ્રીમ કોર્ટે છ વિરુદ્ધ ત્રણના બહુમતી મતે સરકારના ટેરિફ પ્રસ્તાવોને ફગાવી દીધા હતા. નોંધનીય બાબત એ છે કે ટ્રમ્પ દ્વારા નિયુક્ત કરવામાં આવેલા ન્યાયાધીશો બેરેટ અને ગોરસચની સાથે ચીફ જાસ્ટિસ રોબર્ટસે પણ ઉદારવાદી ન્યાયાધીશોનો સાથ આપ્યો હતો. પોતાના જ પક્ષ દ્વારા સમર્થિત મનાતા ન્યાયાધીશોએ વિરુદ્ધમાં મતદાન કરતા ટ્રમ્પે સોશિયલ મીડિયા અને જાહેર સંબોધનોમાં પોતાની નારાજગી વ્યક્ત કરી છે.
ડિજિટલ પ્લેટફોર્મ પર વાયરલ થઈ રહેલા અહેવાલો મુજબ, ટ્રમ્પે આ સ્થિતિની તુલના ભૂતકાળના ઐતિહાસિક સંજોગો સાથે કરી છે. તેમણે સંકેત આપ્યો છે કે જે રીતે અબ્રાહમ લિકને રાષ્ટ્રના અસ્તિત્વ માટે કઠોર અને નિર્ણાયક પગલાં લીધા હતા, તે જ રીતે તેઓ પણ ગણતંત્રને બચાવવા માટે જરૂરી તમામ પ્રયાસો કરશે. ટ્રમ્પના ટેકેદારો દ્વારા સોશિયલ મીડિયા પર એવી તસવીરો પણ શેર કરવામાં આવી રહી છે જેમાં સુપ્રીમ કોર્ટના તમામ ન્યાયાધીશોના સ્થાને ક્લેરન્સ થોમસ જેવા કટ્ટરપંથી ન્યાયાધીશોના ચહેરા મૂકવામાં આવ્યા હોય, જે ન્યાયતંત્રમાં મોટા ફેરફારની માંગ દર્શાવે છે.
ટ્રમ્પે ભારપૂર્વક જણાવ્યું છે કે રાષ્ટ્રના હિતમાં લેવાયેલા નિર્ણયોને રોકવા માટે ન્યાયતંત્રમાં જે અવરોધો આવી રહ્યા છે તેને દૂર કરવા માટે તેઓ મક્કમ છે. તેમણે કહ્યું કે ગણતંત્રને બચાવવાનો નિર્ણય લેવાઈ ચૂક્યો છે અને હવે તેને કોઈ રોકી શકશે નહીં. આ નિવેદનને કારણે અમેરિકાના રાજકારણમાં અને કાયદાકીય વર્તુળોમાં મોટી ચર્ચા જાગી છે. વહીવટીતંત્ર અને ન્યાયતંત્ર વચ્ચેનો આ ટકરાવ આગામી સમયમાં ગંભીર વળાંક લઈ શકે છે.
અમેરિકાના વિવિધ મીડિયા પ્લેટફોર્મ્સ અને સોશિયલ મીડિયા હેન્ડલ્સ પર આ સમાચાર વાયુવેગે ફેલાઈ રહ્યા છે. ટ્રમ્પના સમર્થકો માની રહ્યા છે કે દેશના આર્થિક હિતો માટે ટેરિફ અનિવાર્ય છે, જ્યારે સુપ્રીમ કોર્ટના ચુકાદાને કારણે કાયદાકીય ગૂંચવણો ઊભી થઈ છે. ટ્રમ્પની આક્રમક રજૂઆત સૂચવે છે કે તેઓ આગામી દિવસોમાં ન્યાયતંત્રની સંરચના અથવા સત્તાઓ પર પ્રહાર કરી શકે તેવા કોઈ વટહુકમ કે કાયદાકીય ફેરફારો લાવી શકે છે. નિષ્ણાતો આ સ્થિતિને બંધારણીય કટોકટી તરીકે જોઈ રહ્યા છે, જ્યાં કારોબારી અને ન્યાયતંત્ર સામસામે આવી ગયા છે.
(2:12 PM IST)
છેલ્લા 8 દિવસમાં સૌથી લોકપ્રિય 
