નવી દિલ્હી:  ભારતમાં સાયબર છેતરપિંડીનું જાળું જે રીતે ફેલાઈ રહ્યું છે, તેને જડબાતોડ જવાબ આપવા માટે ભારતી એરટેલે એક અત્યંત મહત્વકાંક્ષી પહેલ કરી છે. નવી દિલ્હીમાં આયોજિત 'AI ઈમ્પેક્ટ સમિટ 2026' દરમિયાન એરટેલે કેલિફોર્નિયા સ્થિત પ્રખ્યાત AI સુરક્ષા સ્ટાર્ટઅપ Zscaler સાથે હાથ મિલાવ્યા છે. આ ભાગીદારી હેઠળ ભારતમાં એક અત્યાધુનિક 'AI અને સાયબર થ્રેટ રિસર્ચ સેન્ટર' સ્થાપિત કરવામાં આવશે. આ કેન્દ્ર માત્ર ટેલિકોમ ગ્રાહકોને જ નહીં, પરંતુ ભારતની રાષ્ટ્રીય સુરક્ષા, બેંકિંગ નેટવર્ક અને ડિજિટલ ઈન્ફ્રાસ્ટ્રક્ચરને આંતરરાષ્ટ્રીય સ્તરના સાયબર હુમલાઓથી સુરક્ષિત રાખવાનું કામ કરશે.

એરટેલના એક્ઝિક્યુટિવ વાઇસ પ્રેસિડેન્ટ ગોપાલ વિટ્ટલે આ પ્રોજેક્ટ પર પ્રકાશ પાડતા જણાવ્યું કે, આ સંશોધન કેન્દ્ર સાયબર જોખમો સામે લડવા માટે એક 'પ્રી-એમ્પટિવ' (અગાઉથી અટકાવનાર) પદ્ધતિ વિકસાવશે. ThreatLabz India ની ટીમે તાજેતરમાં એક ચોંકાવનારો ખુલાસો કર્યો છે કે ભારતના જાહેર અને ખાનગી ક્ષેત્રોમાં અંદાજે ૧.૨ મિલિયન ઘૂસણખોરીના પ્રયાસો થયા છે, જે ૨૦,૦૦૦ થી વધુ અલગ-અલગ સ્ત્રોતોમાંથી ઉદ્ભવ્યા હતા. આ સંશોધન કેન્દ્ર ખાસ કરીને ભારતીય સંસ્થાઓને લક્ષ્ય બનાવતી પ્રાદેશિક અને ભૂ-રાજકીય સાયબર ધમકીઓનું ૨૪x૭ મોનિટરિંગ કરશે, જેથી છેતરપિંડી કરનારાઓ નેટવર્કમાં પ્રવેશ કરે તે પહેલા જ તેમને અટકાવી શકાય.

ઉલ્લેખનીય છે કે, એરટેલ તેના નેટવર્ક સ્તરે જ સ્પામ કોલ્સ અને સંદેશાઓને ઓળખવા માટે AI ટૂલ રજૂ કરનાર દેશની પ્રથમ કંપની છે. Zscaler ના CEO જય ચૌધરીના જણાવ્યા અનુસાર, આ નવું રિસર્ચ સેન્ટર ભારતને એક વિશાળ 'સુરક્ષા ક્લાઉડ' પૂરો પાડશે, જે ડિજિટલ યુગમાં દેશની અર્થવ્યવસ્થા અને સુરક્ષા માટે મજબૂત ઢાલ સાબિત થશે. હવે જ્યારે સાયબર ગુનેગારો વધુ હાઈ-ટેક બની રહ્યા છે, ત્યારે એરટેલનું આ પગલું સામાન્ય વપરાશકર્તાઓને ભય વગર ઓનલાઈન ટ્રાન્ઝેક્શન કરવાની અને ડિજિટલ પ્લેટફોર્મનો ઉપયોગ કરવાની આઝાદી આપશે.