ઇન્દોર: ભારતની રાજધાનીમાં આયોજિત ગ્લોબલ AI સમિટમાં શરૂ થયેલો 'શર્ટલેસ' વિરોધ પ્રદર્શનનો વિવાદ હવે રાષ્ટ્રીય કક્ષાનો રાજકીય સંગ્રામ બની ગયો છે. શનિવારે આ વિવાદ દિલ્હીથી લઈને ઇન્દોર અને મુંબઈ સુધી પ્રસરી ગયો હતો, જેમાં અનેક જગ્યાએ કોંગ્રેસ અને ભાજપના કાર્યકરો વચ્ચે હિંસક અથડામણો જોવા મળી હતી. ગાંધીજીના શર્ટલેસ પોસ્ટરો અને યુવા કોંગ્રેસના આક્રમક તેવરે લોકશાહીના મેદાનમાં ગરમાવો લાવી દીધો છે.
ઇન્દોરમાં સંગ્રામ: પથ્થરમારો અને મુક્કાબાજી
મધ્યપ્રદેશના ઇન્દોરમાં સ્થિતિ અત્યંત તણાવપૂર્ણ બની ગઈ હતી. યુથ કોંગ્રેસ અને ભાજપ યુવા મોરચા (BJYM) ના કાર્યકરો સામસામે આવી ગયા હતા. બંને પક્ષો વચ્ચે પથ્થરમારો અને મુક્કાબાજી થતા અનેક લોકો લોહીલુહાણ થયા હતા. કોંગ્રેસે આક્ષેપ કર્યો છે કે ભાજપના ગુંડાઓએ પોલીસની હાજરીમાં તેમના કાર્યાલય પર હુમલો કર્યો, જેમાં જિલ્લા પ્રમુખ વિપિન વાનખેડે ઘાયલ થયા છે. પરિસ્થિતિ કાબૂમાં લેવા માટે શહેરમાં વધારાની પોલીસ ફોર્સ તૈનાત કરવી પડી હતી.
દિલ્હી-ચંદીગઢમાં ‘વોટર કેનન’નો મારો
દિલ્હી અને ચંદીગઢમાં પણ કોંગ્રેસના કાર્યકરોએ પીએમ મોદી અને અમેરિકા-ભારત વચ્ચેના ટ્રેડ ડીલ સામે મોરચો માંડ્યો હતો. "પીએમ સાથે ચેડા થયા છે" ના નારા સાથે આગળ વધતા કાર્યકરોને રોકવા માટે પોલીસે વોટર કેનન (પાણીના મારો) નો ઉપયોગ કર્યો હતો. દિલ્હીમાં તો ગાંધીજીના શર્ટલેસ ચિત્રોવાળા પોસ્ટરો લગાવીને કોંગ્રેસે પોતાનો વિરોધ પ્રદર્શિત કર્યો હતો.
ભાજપનો પલટવાર: રાહુલ ગાંધીને કાળા ઝંડા
ભાજપે પણ આક્રમક વલણ અપનાવતા ઉત્તર પ્રદેશના ફિરોઝાબાદમાં રાહુલ ગાંધીનું પુતળું બાળ્યું હતું. મુંબઈમાં કોર્ટમાં હાજરી આપવા પહોંચેલા રાહુલ ગાંધીને BJYM ના કાર્યકરોએ કાળા ઝંડા બતાવી ભારે સૂત્રોચ્ચાર કર્યા હતા. કેન્દ્રીય મંત્રી ગિરિરાજ સિંહે કોંગ્રેસને ‘દેશદ્રોહી’ જેવું વર્તન કરનારી પાર્ટી ગણાવી રાહુલ ગાંધી પાસે માફીની માંગ કરી છે.
સાથી પક્ષોએ પણ ફેરવી તોળ્યું મોઢું!
નવાઈની વાત એ છે કે, વિપક્ષી ગઠબંધનના સાથી પક્ષોએ પણ કોંગ્રેસની આ પદ્ધતિની ટીકા કરી છે.
•    અખિલેશ યાદવ: "વિદેશી મહેમાનો સામે ભારતનું અપમાન થાય તેવો વિરોધ ટાળવો જોઈએ."
•    માયાવતી: "AI કાર્યક્રમમાં જે રીતે વિરોધ થયો તે અત્યંત નિંદનીય અને અપમાનજનક છે."
•    નારા લોકેશ: "આંતરરાષ્ટ્રીય મંચ પર રાજકીય તમાશો દેશની પ્રતિષ્ઠા ઘટાડે છે."
દિલ્હી પોલીસે આ કેસમાં પકડાયેલા ૪ આરોપીઓને ૫ દિવસની કસ્ટડીમાં લીધા છે. પોલીસના દાવા મુજબ આ પ્રદર્શનકારીઓ નેપાળમાં થયેલા હિંસક વિરોધ પ્રદર્શનોથી પ્રેરિત હતા. હાલ તો સમગ્ર દેશમાં આ મુદ્દે રાજકીય ગરમાવો ચરમસીમાએ છે.