નવી દિલ્હી: : રાજધાની દિલ્હીમાં આજે કોર્પોરેટ જગતના દિગ્ગજોનો મેળાવડો જામ્યો હતો. ઓલ ઈન્ડિયા મેનેજમેન્ટ એસોસિએશન (AIMA) ના પ્રતિષ્ઠિત 'મેનેજિંગ ઈન્ડિયા એવોર્ડ્સ ૨૦૨૬' માં અદાણી પોર્ટ્સ અને અદાણી સિમેન્ટના મેનેજિંગ ડિરેક્ટર કરણ અદાણીએ મેદાન માર્યું છે. તેમને વર્ષ ૨૦૨૬ ના 'બિઝનેસ લીડર ઓફ ધ યર' તરીકે જાહેર કરવામાં આવ્યા છે. તાજ પેલેસ હોટેલ ખાતે આયોજિત પ્લેટિનમ જ્યુબિલી કાર્યક્રમમાં આ સન્માન એનાયત કરવામાં આવ્યું હતું.
સફળતાનો શ્રેય પિતાના વારસા અને કર્મચારીઓની મહેનતને
એવોર્ડ સ્વીકારતી વખતે કરણ અદાણી ભાવુક જોવા મળ્યા હતા. તેમણે આ પ્રતિષ્ઠિત સન્માન અદાણી ગ્રુપના લાખો કર્મચારીઓને સમર્પિત કર્યું જેઓ દિવસ-રાત મહેનત કરી રહ્યા છે. પોતાના સંબોધનમાં તેમણે કહ્યું:
"હું મારા પિતા (ગૌતમ અદાણી) નો આભાર માનું છું, જેમની પાસેથી હું દરરોજ કંઈક નવું શીખું છું. મારી માતાએ મને કરુણા અને પ્રામાણિકતાના પાઠ ભણાવ્યા છે. અમે ચારેય ભાઈઓ સાથે મળીને પિતાના ભવ્ય વારસાને આગળ લઈ જઈશું."
બિઝનેસ જગતના અન્ય ‘સિતારાઓ’ પણ ચમક્યા
આ વર્ષના એવોર્ડ્સમાં માત્ર અદાણી જ નહીં, પણ અન્ય ક્ષેત્રોના માંધાતાઓનું પણ સન્માન કરવામાં આવ્યું હતું:
•    દાયકાના બિઝનેસ લીડર (Leader of the Decade): સુનિલ ભારતી મિત્તલ (એરટેલ)
•    વર્ષના યુવાન બિઝનેસ લીડર: અનન્યા બિરલા
•    લાઈફટાઈમ એચિવમેન્ટ એવોર્ડ: હર્ષ મારીવાલા (મેરિકો)
•    વર્ષના શ્રેષ્ઠ ઉદ્યોગસાહસિક: રેપિડો (Rapido) ના સ્થાપકો
•    પત્રકારત્વમાં શ્રેષ્ઠતા: રાહુલ કંવલ (NDTV)
ભારતના આર્થિક વેગને નવી દિશા
કિર્લોસ્કર બ્રધર્સના સંજય કિર્લોસ્કરે કરણ અદાણીના એવોર્ડ માટેનું પ્રશસ્તિપત્ર વાંચ્યું હતું. આ કાર્યક્રમમાં દેશના ટોચના નીતિ નિર્માતાઓ અને સ્વપ્નદ્રષ્ટાઓએ ભાગ લીધો હતો. ચર્ચાનો મુખ્ય વિષય વૈશ્વિક પડકારો વચ્ચે ભારતના આર્થિક વિકાસને કેવી રીતે વેગ આપવો તે હતો. કરણ અદાણીએ જે રીતે અદાણી પોર્ટ્સ અને સિમેન્ટ સેક્ટરમાં પરિવર્તન આણ્યું છે, તેની તમામ દિગ્ગજોએ પ્રશંસા કરી હતી.
વિજેતાઓની સંપૂર્ણ યાદી પર એક નજર
IDFC FIRST બેંકના વી વૈદ્યનાથનને 'ટ્રાન્સફોર્મેશનલ બિઝનેસ લીડર' અને મધરસન ગ્રુપને 'શ્રેષ્ઠ ભારતીય MNC' નો એવોર્ડ મળ્યો હતો. માઈક્રોન ટેકનોલોજીને ભારતમાં વર્ષની શ્રેષ્ઠ MNC તરીકે નવાજવામાં આવી હતી. ૨૦૧૦ થી શરૂ થયેલા આ એવોર્ડ્સ આજે ભારતમાં મેનેજમેન્ટ અને બિઝનેસ ક્ષેત્રે 'ઓસ્કાર' સમાન ગણાય છે.