અયોધ્યા: અયોધ્યામાં રામ લલ્લાના બિરાજમાન થયા બાદ હવે વિશ્વભરના દિગ્ગજ નેતાઓ પ્રભુના દર્શન કરવા ઉમટી રહ્યા છે. આ કડીમાં શનિવારે દક્ષિણ અમેરિકાના દેશ ગુયાનાના ઉપરાષ્ટ્રપતિ ડૉ. ભરત જગદેવ એક ઉચ્ચ સ્તરીય પ્રતિનિધિમંડળ સાથે અયોધ્યા પહોંચ્યા હતા. ભવ્ય રામ મંદિરની મુલાકાત લઈને તેઓ અભિભૂત થયા હતા અને ભારતીય સંસ્કૃતિની આ વિરાસતને નજીકથી નિહાળી હતી.
એરપોર્ટ પર ‘અતિથિ દેવો ભવ:’ નો નજારો
શનિવારે સવારે જ્યારે ડૉ. ભરત જગદેવનું ખાનગી વિમાન મહર્ષિ વાલ્મીકિ આંતરરાષ્ટ્રીય એરપોર્ટ પર ઉતર્યું, ત્યારે વાતાવરણ શંખનાદથી ગુંજી ઉઠ્યું હતું. કલાકારોએ પરંપરાગત લોકનૃત્યો સાથે તેમનું સ્વાગત કર્યું હતું. એરપોર્ટ પર ઉત્તર પ્રદેશના મંત્રી સતીશ ચંદ્ર શર્મા, મેયર ગિરીશપતિ ત્રિપાઠી અને જિલ્લા પ્રશાસનના ઉચ્ચ અધિકારીઓએ ગુલદસ્તો ભેટ આપી મહેમાનનું ઉષ્માભર્યું સ્વાગત કર્યું હતું.
મંદિર સંકુલમાં ભક્તિમય એક કલાક
ઉપરાષ્ટ્રપતિ સીધા જ શ્રી રામ જન્મભૂમિ મંદિર પહોંચ્યા હતા, જ્યાં તેમણે મુખ્ય ગર્ભગૃહમાં રામ લલ્લાની પૂજા-અર્ચના કરી હતી. તેમણે મંદિર સંકુલમાં લગભગ એક કલાકનો સમય વિતાવ્યો હતો. આ દરમિયાન તેમણે નિર્માણ પામી રહેલા અન્ય મંદિરો અને કલાકૃતિઓનું પણ નિરીક્ષણ કર્યું હતું. અયોધ્યાનો નવો કાયાકલ્પ અને મંદિરની સ્થાપત્યકળા જોઈને તેમણે આશ્ચર્ય અને આનંદ વ્યક્ત કર્યો હતો.
લોખંડી સુરક્ષા બંદોબસ્ત
વિદેશી હાઈ-પ્રોફાઈલ મહેમાનની મુલાકાતને ધ્યાનમાં રાખીને અયોધ્યા પોલીસે ચુસ્ત સુરક્ષા વ્યવસ્થા ગોઠવી હતી. એસપી ચક્રપાણી ત્રિપાઠીએ જણાવ્યું હતું કે એરપોર્ટથી લઈને મંદિર સંકુલ સુધીના સમગ્ર રૂટ પર ખાસ સુરક્ષા કવચ તૈનાત કરવામાં આવ્યું હતું, જેથી મુલાકાત નિર્વિઘ્ન સંપન્ન થઈ શકે.
ગુયાનામાં વસતા ભારતીય મૂળના લોકો અને ત્યાંની સંસ્કૃતિમાં રામાયણનું વિશેષ મહત્વ છે, તેવામાં ઉપરાષ્ટ્રપતિની આ મુલાકાત બંને દેશોના સાંસ્કૃતિક સંબંધોને વધુ મજબૂત બનાવશે તેવું માનવામાં આવી રહ્યું છે.