વોશિંગ્ટન:  અમેરિકામાં ધર્મ અને શિક્ષણ વચ્ચેના જોડાણ પર પ્યુ રિસર્ચ સેન્ટર  દ્વારા જાહેર કરવામાં આવેલા તાજેતરના આંકડાઓએ સમગ્ર વિશ્વનું ધ્યાન ખેંચ્યું છે. ૧૯ ફેબ્રુઆરી, ૨૦૨૬ના રોજ બહાર પાડવામાં આવેલા 'ધાર્મિક લેન્ડસ્કેપ સ્ટડી' મુજબ, અમેરિકામાં હિન્દુ ધર્મના અનુયાયીઓ સૌથી વધુ શિક્ષિત જૂથ તરીકે ઉભરી આવ્યા છે. આ યાદીમાં હિન્દુઓએ બૌદ્ધિક રીતે અત્યંત સમૃદ્ધ ગણાતા યહૂદી સમુદાયને પણ બીજા ક્રમે ધકેલી દીધો છે. રિપોર્ટ અનુસાર, અમેરિકામાં વસતા ૭૦ ટકા હિન્દુઓ સ્નાતક  કે તેથી વધુની શૈક્ષણિક ડિગ્રી ધરાવે છે, જે દર્શાવે છે કે આ સમુદાય અમેરિકાના આર્થિક અને બૌદ્ધિક માળખામાં કેટલું મજબૂત યોગદાન આપી રહ્યો છે.

પ્યુ રિસર્ચના વિશ્લેષણ મુજબ, યહૂદી સમુદાય ૬૫ ટકા સાથે બીજા ક્રમે છે, જ્યારે રૂઢિચુસ્ત ખ્રિસ્તીઓ ૪૫ ટકા અને મુસ્લિમો ૪૪ ટકા સાથે તે પછીના ક્રમે આવે છે. આ આંકડાઓની સરખામણી જ્યારે અમેરિકાની સરેરાશ વસ્તી સાથે કરવામાં આવે ત્યારે હિન્દુઓની સિદ્ધિ વધુ ભવ્ય દેખાય છે, કારણ કે સમગ્ર અમેરિકામાં માત્ર ૩૫ ટકા લોકો જ કોલેજ ડિગ્રી ધરાવે છે. નિષ્ણાતોના મતે, આ સફળતા પાછળ ભારતથી અમેરિકા જતી 'સિલેક્ટિવ ઇમિગ્રેશન' (પસંદગીયુક્ત સ્થળાંતર) પેટર્ન જવાબદાર છે. જે ભારતીયો અમેરિકા જાય છે, તેઓ મોટે ભાગે આઈટી, મેડિકલ કે એન્જિનિયરિંગ બેકગ્રાઉન્ડના હોય છે, જેની અસર આ સર્વેના આંકડામાં સ્પષ્ટ દેખાય છે.

આ સર્વે જુલાઈ ૨૦૨૩થી માર્ચ ૨૦૨૪ દરમિયાન આશરે ૩૭,૦૦૦ અમેરિકન પુખ્ત વયના લોકો પર કરવામાં આવ્યો હતો. રિપોર્ટમાં નોંધવામાં આવ્યું છે કે હિન્દુ સમુદાયની આ મહેનત અને મહત્વાકાંક્ષા તેમને અમેરિકાના સામાજિક અને રાજકીય ફલક પર પણ વધુ પ્રભાવશાળી બનાવી રહી છે. શિક્ષણનું આ ઉચ્ચ સ્તર હિન્દુઓને ઉચ્ચ વેતન ધરાવતી નોકરીઓ અને નિર્ણાયક ભૂમિકાઓમાં સ્થાપિત કરવામાં મદદરૂપ થાય છે. પ્યુ રિસર્ચનો આ અભ્યાસ સાબિત કરે છે કે અમેરિકન ડ્રીમ  ને સાકાર કરવામાં હિન્દુ સમુદાય આજે અગ્રેસર છે અને તેમની સંસ્કૃતિમાં રહેલી વિદ્યા પ્રત્યેની શ્રદ્ધા આંતરરાષ્ટ્રીય સ્તરે પરિણામ આપી રહી છે.