દેશની પ્રતિષ્ઠિત બનારસ હિન્દુ યુનિવર્સિટી (બીએચયુ) માં સુરક્ષા વ્યવસ્થાના લીરેલીરા ઉડાવતી ઘટના સામે આવી છે. યુનિવર્સિટીની હોસ્ટેલની બહાર અજાણ્યા શખ્સો દ્વારા અંધાધૂંધ ફાયરિંગ કરવામાં આવતા સમગ્ર કેમ્પસમાં દહેશતનો માહોલ ફેલાઈ ગયો છે. 

આ ઘટનામાં એક વિદ્યાર્થી સદનસીબે બચી ગયો હતો, પરંતુ કેમ્પસની સુરક્ષા સામે ગંભીર સવાલો ઉભા થયા છે. આ ઘટનાથી રોષે ભરાયેલા પીડિત વિદ્યાર્થી અને તેના સાથીદારોએ યુનિવર્સિટીના ચીફ પ્રોક્ટરના રાજીનામાની માંગ સાથે ઉગ્ર વિરોધ પ્રદર્શન શરૂ કર્યું છે. 

વિદ્યાર્થીઓનું કહેવું છે કે કેમ્પસમાં અવારનવાર બહારના તત્વો ઘૂસી આવે છે અને સુરક્ષા ગાર્ડ તેમને રોકવામાં નિષ્ફળ રહે છે. આ ઘટનાને પગલે વાતાવરણ તંગ બની ગયું છે અને મોટી સંખ્યામાં પોલીસ બળ કેમ્પસમાં તૈનાત કરી દેવામાં આવ્યું છે. 

યુનિવર્સિટી પ્રશાસન દ્વારા શાંતિ જાળવવા અપીલ કરવામાં આવી છે અને ફાયરિંગ કરનારા શખ્સોને પકડવા માટે તપાસ સમિતિની રચના કરવામાં આવી છે. વિદ્યાર્થી સંગઠનોએ ચેતવણી આપી છે કે જો ટૂંક સમયમાં કડક પગલાં લેવામાં નહીં આવે તો તેઓ આંદોલનને વધુ તેજ બનાવશે.