બેંગલુરુ: કર્ણાટકની સિદ્ધારમૈયા સરકાર વિદ્યાર્થીઓના ભવિષ્યને સુરક્ષિત કરવા માટે એક ક્રાંતિકારી અને કડક કાયદો લાવવાની દિશામાં આગળ વધી રહી છે. રાજ્યમાં ૧૬ વર્ષથી ઓછી ઉંમરના સગીર વિદ્યાર્થીઓ માટે મોબાઈલ ફોનના ઉપયોગ પર સંપૂર્ણ પ્રતિબંધ મૂકવાની ગંભીરતાથી વિચારણા શરૂ કરવામાં આવી છે. મુખ્યમંત્રી સિદ્ધારમૈયાએ રાજ્યની તમામ સરકારી યુનિવર્સિટીઓના કુલપતિઓ (Vice Chancellors) સાથેની બેઠકમાં આ મુદ્દો ઉઠાવ્યો હતો અને તેમની પાસે નિષ્ણાત અભિપ્રાય માંગ્યો છે. સરકારનો મુખ્ય હેતુ બાળકોમાં વધતા સોશિયલ મીડિયાના વળગણ અને મોબાઈલ દ્વારા ફેલાતા ડ્રગ્સના જાળને તોડવાનો છે.
મુખ્યમંત્રીએ બેઠક દરમિયાન ઊંડી ચિંતા વ્યક્ત કરતા જણાવ્યું હતું કે, આજના યુગમાં બાળકો સોશિયલ મીડિયાના 'ઝનૂની' બની રહ્યા છે, જે તેમના શિક્ષણ અને માનસિક સ્વાસ્થ્ય માટે ઘાતક સાબિત થઈ રહ્યું છે. મોબાઈલ ફોનનો અનિયંત્રિત ઉપયોગ વિદ્યાર્થીઓના વર્તનમાં નકારાત્મક ફેરફારો લાવી રહ્યો છે. આ ઉપરાંત, મોબાઈલ દ્વારા ડ્રગ્સ પેડલરો બાળકો સુધી પહોંચી રહ્યા હોવાના કિસ્સાઓ પણ સરકારના ધ્યાન પર આવ્યા છે. મુખ્યમંત્રીએ ભારપૂર્વક કહ્યું કે જો સમયસર પગલાં લેવામાં નહીં આવે તો નવી પેઢીનું ભવિષ્ય અંધકારમય બની શકે છે.
ભારતમાં આ પ્રકારનો પ્રતિબંધ મૂકનાર કર્ણાટક કદાચ પ્રથમ રાજ્ય બની શકે છે. મુખ્યમંત્રીએ આ તકે ઓસ્ટ્રેલિયા સહિતના અન્ય દેશોના ઉદાહરણો આપ્યા હતા, જ્યાં વિદ્યાર્થીઓ માટે મોબાઈલ ફોન પર પહેલેથી જ પ્રતિબંધ મૂકવા માટે કાયદાકીય પગલાં લેવાયા છે. શિક્ષણ ક્ષેત્રના માંધાતાઓ એવા કુલપતિઓનો અભિપ્રાય આ નીતિ ઘડવામાં પાયારૂપ બનશે. સરકાર હવે શિક્ષણવિદોના પ્રતિસાદ બાદ ટૂંક સમયમાં અંતિમ માર્ગદર્શિકા જાહેર કરે તેવી શક્યતા છે. આ નિર્ણયથી વાલીઓ અને શાળાઓમાં મિશ્ર પ્રતિસાદ જોવા મળી રહ્યો છે.