નવી દિલ્હી:  ભારતની સુરક્ષા એજન્સીઓએ એક અત્યંત ખતરનાક આતંકી કાવતરાને નિષ્ફળ બનાવતા લશ્કર-એ-તૈયબાના બાંગ્લાદેશી મોડ્યુલનો પર્દાફાશ કર્યો છે. દિલ્હી પોલીસના સ્પેશિયલ સેલે તમિલનાડુ અને પશ્ચિમ બંગાળમાં દરોડા પાડીને કુલ ૮ શંકાસ્પદ આતંકીઓની ધરપકડ કરી છે, જેમના તાર સીધા પાકિસ્તાન સ્થિત આતંકી આકાઓ સાથે જોડાયેલા હોવાનું બહાર આવ્યું છે. તપાસમાં સૌથી ચોંકાવનારો ખુલાસો એ થયો છે કે આ મોડ્યુલનો મુખ્ય સૂત્રધાર શબ્બીર શાહ ઉર્ફે શબ્બીર અહેમદ લોન વર્ષ ૨૦૦૭થી હાફિઝ સઈદ અને મુંબઈ હુમલાના ગુનેગાર ઝકીઉર રહેમાન લખવીના સંપર્કમાં હતો. આ ધરપકડ બાદ એજન્સીઓએ આતંકીઓ પાસેથી ૧૨થી વધુ મોબાઈલ ફોન અને ૧૬ જેટલા એક્ટિવ સિમકાર્ડ જપ્ત કર્યા છે, જેનો ઉપયોગ દેશવિરોધી પ્રવૃત્તિઓ માટે કરવામાં આવતો હતો.

સ્પેશિયલ સેલની પૂછપરછમાં એ વાત પણ સામે આવી છે કે પાકિસ્તાની ગુપ્તચર એજન્સી ISI હવે ભારતમાં આતંક ફેલાવવા માટે એક નવો પેંતરો અજમાવી રહી છે. ISI દ્વારા ભારતમાં ગેરકાયદેસર રીતે વસતા બાંગ્લાદેશી નાગરિકોને નિશાન બનાવીને તેમની આતંકી જૂથોમાં ભરતી કરવામાં આવી રહી છે. આ ‘સ્લીપર સેલ’ મોડ્યુલને તૈયાર કરવા માટે મોટા પાયે ફંડિંગ પણ પૂરું પાડવામાં આવતું હતું. શબ્બીર શાહ, જે અગાઉ ૨૦૦૭માં દિલ્હીમાં ઝડપાયો હતો અને ૨૦૧૭માં જેલમુક્ત થયા બાદ ભારત છોડી ભાગી ગયો હતો, તે વિદેશમાં બેસીને આ આખું નેટવર્ક ઓપરેટ કરી રહ્યો હોવાની આશંકા છે. આ આતંકીઓ દ્વારા ભારતના વ્યૂહાત્મક સ્થળો અને ભીડભાડવાળા વિસ્તારોને નિશાન બનાવવાનું ષડયંત્ર રચવામાં આવ્યું હતું.

દિલ્હીના ઐતિહાસિક લાલ કિલ્લા પાસે સંભવિત વિસ્ફોટની ગુપ્તચર ચેતવણી બાદ સુરક્ષા એજન્સીઓ હરકતમાં આવી હતી અને આ મોટા ઓપરેશનને અંજામ આપ્યો હતો. પંજાબ અને કાશ્મીરમાંથી અગાઉ મળી આવેલા વિસ્ફોટકોના તાર પણ આ મોડ્યુલ સાથે જોડાયેલા હોવાની પૂછપરછ ચાલી રહી છે. હાલમાં તમામ આઠેય આતંકીઓને દિલ્હી લાવવાની પ્રક્રિયા હાથ ધરવામાં આવી છે, જ્યાં તેમની આકરી પૂછપરછ કરવામાં આવશે જેથી આ નેટવર્કના અન્ય સભ્યો અને આગામી હુમલાના પ્લાન વિશે વિગતવાર માહિતી મેળવી શકાય. આ ખુલાસા બાદ દેશભરમાં હાઈ એલર્ટ જાહેર કરી દેવામાં આવ્યું છે અને સરહદી વિસ્તારોમાં દેખરેખ વધારી દેવાઈ છે.