મદુરાઈ: ભારતીય ન્યાયતંત્રના ઈતિહાસમાં ભાગ્યે જ જોવા મળે તેવી ઘટનામાં મદ્રાસ હાઈકોર્ટના જસ્ટિસ જી.આર. સ્વામીનાથન પોતાના બેબાક નિવેદનને કારણે મોટા વિવાદમાં ફસાયા છે. એક આધ્યાત્મિક કાર્યક્રમને સંબોધતા તેમણે જાહેર મંચ પરથી કહ્યું કે, "જે લોકો આધ્યાત્મિક ગુરુઓમાં વિશ્વાસ નથી ધરાવતા, તેઓ વાસ્તવમાં દુષ્ટ અને મૂર્ખ છે." ન્યાયાધીશના આ નિવેદને તમિલનાડુના રાજકારણ અને કાનૂની વર્તુળોમાં ભારે ચર્ચા જગાવી છે.
તર્કવાદીઓ વિરુદ્ધ ન્યાયાધીશનો 'સીધો પ્રહાર'
ન્યાયાધીશ સ્વામીનાથને તમિલનાડુના તર્કવાદીઓ (Rationalists) પર નિશાન સાધતા કહ્યું કે, કેટલાક લોકો પોતાને બુદ્ધિશાળી માને છે અને અમને મૂર્ખ કહે છે કારણ કે અમે ગુરુને ભગવાન માનીએ છીએ. તેમણે આક્રમક શૈલીમાં ઉમેર્યું, "હું કહું છું કે જે લોકો અમને મૂર્ખ કહે છે, તેઓ પોતે જ બદમાશ અને ક્રૂર છે. મારી નિવૃત્તિને હજુ ચાર વર્ષની વાર છે અને મને લાગે છે કે હવે મારે સત્ય બોલવા માટે ડરવાની જરૂર નથી." તેમણે એમ પણ જણાવ્યું કે તેમની હિંમત પાછળ તેમના ગુરુના આશીર્વાદ છે.
શું હતો 'દીપથૂન' વિવાદ?
આ વિવાદના મૂળ ૧ ડિસેમ્બર, ૨૦૨૫ના એક આદેશમાં છુપાયેલા છે. તિરુપ્પરંકુન્દ્રમ ટેકરી પર એક દરગાહ નજીક પ્રાચીન પથ્થરનો દીવાસ્તંભ 'દીપથૂન' આવેલો છે. હિન્દુ ભક્તો ત્યાં 'કાર્તિગાઈ દીપમ' પ્રગટાવવાની પરવાનગી માંગતા હતા. જસ્ટિસ સ્વામીનાથને માત્ર પરવાનગી જ ન આપી, પરંતુ જ્યારે સરકારે વ્યવસ્થા ન કરી ત્યારે ૩ ડિસેમ્બરે બીજો આદેશ આપીને ભક્તોને જાતે દીવા પ્રગટાવવાની છૂટ આપી અને કેન્દ્રીય સુરક્ષા દળો (CISF) ને તેમની રક્ષા કરવાનો આદેશ આપ્યો હતો.
 
ન્યાયાધીશના વિવાદિત નિવેદનોની શ્રેણી:
•    વેદ અને રક્ષણ: અગાઉ તેમણે કહ્યું હતું કે જો આપણે વેદોનું રક્ષણ કરીશું, તો વેદ આપણું રક્ષણ કરશે.
•    બંધારણ vs ધર્મ: ટીકાકારોનો આક્ષેપ છે કે ન્યાયાધીશ બંધારણીય મૂલ્યો કરતા ધાર્મિક માન્યતાઓને વધુ મહત્વ આપી રહ્યા છે.
•    યોગીનો સંપર્ક: તેમણે પોતે સ્વીકાર્યું કે તેઓ તેનકાસીના એક યોગીના સતત માર્ગદર્શન હેઠળ છે.
સરકાર પહોંચી સુપ્રીમ કોર્ટમાં
ન્યાયાધીશના આદેશ અને તેમની ટિપ્પણીઓથી નારાજ તમિલનાડુ સરકારે સુપ્રીમ કોર્ટના દ્વાર ખખડાવ્યા છે. સરકારની દલીલ છે કે દરગાહ નજીક આ પ્રકારે દીવા પ્રગટાવવાથી સાંપ્રદાયિક તણાવ વધી શકે છે. હવે જોવાનું એ રહેશે કે સર્વોચ્ચ અદાલત હાઈકોર્ટના ન્યાયાધીશના આ 'આધ્યાત્મિક જોશ' અને કાયદાકીય મર્યાદા વચ્ચે કેવી રીતે સંતુલન જાળવે છે.