નવી દિલ્હી: કર્મચારી ભવિષ્ય નિધિ સંગઠન (EPFO) ના સભ્યો માટે કેન્દ્ર સરકારે એક ખુશીના સમાચાર આપ્યા છે. વર્ષોથી નિષ્ક્રિય પડેલા પીએફ ખાતાઓમાં જમા કરાયેલા કરોડો રૂપિયા હવે તેના અસલી માલિકો સુધી પહોંચાડવા માટે સરકારે મંજૂરી આપી દીધી છે. EPFO આશરે ૩૧.૮૬ લાખ નિષ્ક્રિય ખાતાઓમાંથી ₹૧૧,૦૦૦ કરોડની જંગી રકમ રિફંડ તરીકે પરત કરશે. આ એવા ખાતાઓ છે જે છેલ્લા ત્રણ વર્ષ કે તેથી વધુ સમયથી કાર્યરત નહોતા.
EPFO એ આ રિફંડ પ્રક્રિયાને વધુ સરળ બનાવવા માટે તેને બે તબક્કામાં વહેંચી છે. પ્રથમ તબક્કા હેઠળ, સંગઠન એવા ૭.૧૧ લાખ ખાતાધારકોની ઓળખ કરશે જેમના ખાતામાં ₹૧,૦૦૦ થી ઓછી રકમ જમા છે. વિભાગ આ સભ્યોના બેંક ખાતાઓ શોધીને સીધી રીતે રકમ ટ્રાન્સફર કરવાની તૈયારીમાં છે.
બીજા તબક્કામાં બાકીના ૨૫ લાખથી વધુ ખાતાધારકોના ફંડ પરત કરવામાં આવશે. આ પ્રક્રિયા માટે સરકારે નિયમોમાં થોડી છૂટછાટ આપી છે જેથી ખાતાધારકો સરળતાથી પોતાના નાણાં મેળવી શકે. ઘણા કિસ્સાઓમાં નોકરી બદલવા અથવા જૂના ખાતાને નવા યુએન (UAN) સાથે લિંક ન કરવાને કારણે આ નાણાં અટવાઈ ગયા હતા.
 નિષ્ક્રિય ખાતાઓમાં પડેલી રકમ પર વ્યાજ મળતું નથી, જેના કારણે સભ્યોને આર્થિક નુકસાન થતું હતું. હવે સરકારે આ 'ડેડ મની' ને પરત કરી લોકોની આજીવન મૂડી તેમને સોંપવાનો નિર્ણય લીધો છે. EPFO આ માટે એક વિશેષ પોર્ટલ અને ડેટાબેઝનો ઉપયોગ કરી રહ્યું છે જેથી છેતરપિંડી ન થાય અને સાચા લાભાર્થીને જ પૈસા મળે.
EPFO રિફંડ પ્લાનની મુખ્ય વિગતો:
• કુલ રકમ: આશરે ₹૧૧,૦૦૦ કરોડ.
• કુલ લાભાર્થીઓ: ૩૧.૮૬ લાખ નિષ્ક્રિય ખાતાધારકો.
• પ્રથમ તબક્કો: ₹૧,૦૦૦થી ઓછી રકમવાળા ૭.૧૧ લાખ ખાતાધારકોને અગ્રતા.
• કારણ: ત્રણ વર્ષથી વધુ સમયથી ખાતામાં કોઈ લેવડ-દેવડ ન હોવી.
જો તમારું પણ કોઈ જૂનું પીએફ ખાતું નિષ્ક્રિય હોય, તો તમારા યુએન (UAN) પોર્ટલ પર જઈને કેવાયસી (KYC) અપડેટ કરવું અત્યંત જરૂરી છે. જો તમારો બેંક એકાઉન્ટ નંબર અને આધાર અપડેટ હશે, તો આ રિફંડ પ્રક્રિયા વધુ ઝડપથી પૂર્ણ થશે.