ઉદયપુર, તા. 24: દક્ષિણ ભારતીય સિનેમાના સૌથી લોકપ્રિય અને ચર્ચિત યુગલ વિજય દેવેરાકોંડા અને રશ્મિકા મંદન્ના, જેમને ચાહકો પ્રેમથી 'વિરોશ' કહી રહ્યા છે, તેમના લગ્નનો જશ્ન હવે આખરે શરૂ થઈ ગયો છે. રાજસ્થાનના ઉદયપુરની અત્યંત વૈભવી હોટલ 'મોમેન્ટોસ એકાયા'માં મંગળવારથી લગ્નની પૂર્વ-વિધિઓનો દબદબાભેર પ્રારંભ થયો છે. સોશિયલ મીડિયા પર આ લગ્નને લઈને ભારે ઉત્તેજના જોવા મળી રહી છે.
પૂલ પાર્ટી અને વોલીબોલની રમઝટ
લગ્નની વિધિઓ શરૂ થાય તે પહેલાં વરરાજા વિજય દેવેરાકોંડાએ તેના મિત્રો અને પરિવાર સાથે શાનદાર પૂલ પાર્ટી માણી હતી. વિજયે તેના ઇન્સ્ટાગ્રામ પર પૂલમાં વોલીબોલ રમતા હોય તેવો વીડિયો શેર કરીને ચાહકોને ખુશ કરી દીધા હતા. બીજી તરફ, દુલ્હન રશ્મિકાએ પણ લગ્ન પૂર્વેના એક ખાસ રોમેન્ટિક ડિનરની તસવીર શેર કરી હતી, જેમાં ટેબલને સફેદ ફૂલો અને ટ્યૂલિપ્સથી સજાવવામાં આવ્યું હતું.
 
આજે 'પીળી થીમ' પર હલ્દી સમારોહ
આજે મંગળવારે હોટલના પ્રાંગણમાં હલ્દી સમારોહનું આયોજન કરવામાં આવ્યું છે. આખા સ્થળને સુંદર પીળા ફૂલો અને સજાવટથી 'યલો થીમ'માં બદલી દેવામાં આવ્યું છે. અહેવાલો મુજબ, વિજય અને રશ્મિકા બંને આ વિધિ માટે ખાસ ડિઝાઈન કરેલા પીળા આઉટફિટમાં સજ્જ થઈને એકબીજાને હલ્દી લગાવશે.
કડક સુરક્ષા: નો-ફોટો પોલિસી
લગ્નની ક્ષણો ખાનગી રહે તે માટે ખાસ તકેદારી રાખવામાં આવી છે. હોટલમાં બાઉન્સર અને પોલીસનો ચુસ્ત બંદોબસ્ત છે. સૌથી મોટી વાત એ છે કે, હોટલ સ્ટાફ અને મહેમાનોના ફોન પર ખાસ ટેપ લગાવી દેવામાં આવી છે જેથી કોઈ ફોટો કે વીડિયો સોશિયલ મીડિયા પર લીક ન થાય. 'નો-ફોટો પોલિસી'નું કડકાઈથી પાલન કરવામાં આવી રહ્યું છે.
બે અલગ પૃષ્ઠભૂમિનું મિલન
વિજય દેવેરાકોંડા ફિલ્મી પૃષ્ઠભૂમિમાંથી આવે છે, તેના પિતા દેવરકોંડા ગોવર્ધન જાણીતા દિગ્દર્શક છે. જ્યારે 'નેશનલ ક્રશ' રશ્મિકાના પિતા મદન મંદન્ના સફળ બિઝનેસમેન છે. "પુષ્પા" અને "એનિમલ" જેવી ફિલ્મોથી લોકપ્રિયતાના શિખરે પહોંચેલી રશ્મિકા અને વિજયની જોડીને રૂપેરી પડદે તો ચાહકોએ ખૂબ જ પસંદ કરી છે, પરંતુ હવે આ જોડી વાસ્તવિક જીવનમાં પણ એક થવા જઈ રહી છે.
આ ભવ્ય લગ્ન સમારોહ 26 ફેબ્રુઆરીના રોજ મુખ્ય વિધિ સાથે પૂર્ણ થશે, જ્યાં આ બંને કલાકારો સત્તાવાર રીતે લગ્નગ્રંથિથી જોડાશે.