નવી દિલ્હી, તા. 24: વિદેશ પ્રવાસનું સપનું જોતા મુસાફરો માટે વિઝાની લાંબી પ્રક્રિયા ઘણીવાર માથાનો દુખાવો સાબિત થાય છે. પરંતુ હવે આ પ્રક્રિયામાં 'આર્ટિફિશિયલ ઇન્ટેલિજન્સ' (AI) ના તડકા સાથે મોટો બદલાવ આવવા જઈ રહ્યો છે. ભારતની અગ્રણી કંપની Sypha AI એ વૈશ્વિક સ્તરે વિઝા અને કોન્સ્યુલર સેવાઓ પૂરી પાડતી દિગ્ગજ કંપની BLS ઇન્ટરનેશનલ સાથે હાથ મિલાવ્યા છે. આ ભાગીદારી હેઠળ, વિશ્વભરના 70 થી વધુ દેશોમાં વિઝા સિસ્ટમને હાઈ-ટેક AI પ્લેટફોર્મ પર અપગ્રેડ કરવામાં આવશે.
કેવી રીતે કામ કરશે આ નવી સિસ્ટમ?
અત્યાર સુધી વિઝા પ્રોસેસિંગમાં જૂની ટેકનોલોજીનો ઉપયોગ થતો હતો, પરંતુ હવે Sypha AI ના પ્લેટફોર્મ દ્વારા તેને આધુનિક બનાવવામાં આવશે.
•    ઝડપી પ્રક્રિયા: AI ના ઉપયોગથી અરજીઓની સ્ક્રિનિંગ અને ડેટા વેરિફિકેશન ખૂબ જ ઝડપથી થઈ શકશે, જેનાથી વિઝા મળવામાં લાગતો સમય ઘટશે.
•    છેતરપિંડી સામે રક્ષણ: આ સિસ્ટમ શંકાસ્પદ દસ્તાવેજો અને પ્રોફાઇલિંગને સેકન્ડોમાં પકડી પાડશે, જે સુરક્ષા એજન્સીઓ માટે વરદાન સાબિત થશે.
•    ડેટા પ્રાઈવસી: આ 'પ્રાઈવસી-ફર્સ્ટ' સિસ્ટમ છે, જેનો અર્થ છે કે મુસાફરોના અંગત ડેટાની સુરક્ષા સાથે કોઈ સમજૂતી કરવામાં આવશે નહીં.
ભારતનું AI પ્લેટફોર્મ દુનિયા ગજવશે
તાજેતરમાં દિલ્હીમાં યોજાયેલ 'ઇન્ડિયા એઆઈ ઇમ્પેક્ટ સમિટ'માં વડાપ્રધાન નરેન્દ્ર મોદીએ Sypha AI ના સ્થાપક અને CEO શોન ચૌહાણ સાથે મુલાકાત કરી હતી. આ ભાગીદારી એ વાતનું પ્રમાણ છે કે 'મેડ ઇન ઇન્ડિયા' AI સોલ્યુશન્સ હવે વૈશ્વિક સ્તરે સરકારી માળખાને મજબૂત કરી રહ્યા છે. BLS ઇન્ટરનેશનલના શિખર અગ્રવાલે જણાવ્યું હતું કે, AI માત્ર ઓટોમેશન જ નહીં, પણ જોખમ-આધારિત નિર્ણયો લેવામાં પણ મદદ કરશે.
વધતી જતી માંગને પહોંચી વળવા માસ્ટર પ્લાન
છેલ્લા કેટલાક વર્ષોમાં વૈશ્વિક સ્તરે વિઝાની માંગમાં મોટો ઉછાળો આવ્યો છે. જ્યારે સરકારો વધુ પારદર્શિતા અને ચોકસાઈ ઈચ્છી રહી છે, ત્યારે આ AI ઇન્ટિગ્રેશન સિસ્ટમ વચેટિયાઓ અને વિલંબને દૂર કરવામાં મદદરૂપ થશે. હવે વિઝા સિસ્ટમમાં માત્ર ટેકનોલોજીનો 'ઢોળ' ચડાવવાને બદલે તેના મૂળ આર્કિટેક્ચરમાં જ AI ને વણી લેવામાં આવ્યું છે.
ભવિષ્યમાં જ્યારે તમે વિઝા માટે અરજી કરશો, ત્યારે બેકએન્ડમાં Sypha AI ની સિસ્ટમ તમારી મુસાફરીને વધુ સરળ અને સુરક્ષિત બનાવવાની ખાતરી આપશે.