ટીકમગઢ, તા. 24: મધ્યપ્રદેશના ફાયરબ્રાન્ડ ભાજપ નેતા અને પૂર્વ મુખ્યમંત્રી ઉમા ભારતીના પરિવાર પર જોખમ તોળાઈ રહ્યું હોવાના સમાચારથી હડકંપ મચી ગયો છે. ઉમા ભારતીના ભત્રીજા અને પૂર્વ મંત્રી રાહુલ સિંહ લોધી તેમજ તેમની પુત્રવધૂ અને ટીકમગઢ જિલ્લા પંચાયત અધ્યક્ષ ઉમિતા સિંહને બોમ્બથી ઉડાવી દેવાની ધમકી મળતા પોલીસ તંત્ર દોડતું થઈ ગયું છે. આ ઘટનાને પગલે ટીકમગઢમાં ભારેલા અગ્નિ જેવી સ્થિતિ સર્જાઈ છે.
સોશિયલ મીડિયા પર મળી ધમકી
ઘટનાની વિગત મુજબ, જિલ્લા પંચાયત અધ્યક્ષ ઉમિતા સિંહે 21મી ફેબ્રુઆરીએ ફેસબુક પર એક પોસ્ટ શેર કરી હતી. 22મીની રાત્રે આ પોસ્ટ પર 'GW બ્રિજેન્દ્ર કુશવાહા' નામના આઈડી પરથી અત્યંત વાંધાજનક ટિપ્પણી કરવામાં આવી હતી. આ કોમેન્ટમાં ઉમિતા સિંહ અને તેમના પતિ રાહુલ લોધીને જાનથી મારી નાખવાની અને આખા પરિવારને બોમ્બથી ઉડાવી દેવાની ગર્ભિત ધમકી આપવામાં આવી હતી.
 
મધરાતે બંગલે પહોંચ્યા રહસ્યમય હુમલાખોરો
ધમકીનો સિલસિલો માત્ર સોશિયલ મીડિયા પૂરતો મર્યાદિત ન રહ્યો. રવિવારે રાત્રે આશરે 11 વાગ્યાની આસપાસ, જ્યારે પરિવાર ઊંઘવાની તૈયારીમાં હતો, ત્યારે બે અજાણ્યા બુકાનીધારી શખ્સો તેમના બંગલે ધસી આવ્યા હતા. ઉમિતા સિંહે આ શખ્સોને બાલ્કનીમાંથી જોયા હતા. બન્ને શખ્સોએ મોઢે રૂમાલ બાંધ્યા હતા અને તેઓ બંગલા પાસે આવીને ગાળાગાળી કરવા લાગ્યા હતા. ઉમિતા સિંહે બૂમાબૂમ કરતા અને ઘરના સુરક્ષાકર્મીઓ જાગી જતા હુમલાખોરો અંધારાનો લાભ લઈને નાસી છૂટ્યા હતા.
પોલીસની કડક કાર્યવાહી
આ મામલે ઉમિતા સિંહે દેહાત પોલીસ સ્ટેશનમાં લેખિત ફરિયાદ નોંધાવી છે. પોલીસે ઘટનાની ગંભીરતાને જોતા ભારતીય ન્યાય સંહિતા (IPC) ની વિવિધ કલમો હેઠળ ગુનો દાખલ કર્યો છે. ટીકમગઢ એસપીએ જણાવ્યું છે કે, "અમે બંગલાની આસપાસના સીસીટીવી ફૂટેજ ચકાસી રહ્યા છીએ. સાથે જ જે ફેસબુક આઈડી પરથી ધમકી મળી છે તેને ટ્રેક કરવા માટે સાયબર પોલીસની મદદ લેવામાં આવી રહી છે."
ઉમા ભારતીના પરિવાર સાથે જોડાયેલો મામલો હોવાથી સમગ્ર રાજ્યમાં આ વિષય ચર્ચાનું કેન્દ્ર બન્યો છે. પોલીસ અત્યારે આ હુમલાખોરો ખરેખર કોણ હતા અને તેમની પાછળ કોઈ રાજકીય ષડયંત્ર છે કે કેમ, તે દિશામાં તપાસ તેજ કરી રહી છે.