નવી દિલ્હી:  ભારતની વિદેશ નીતિમાં હવે એક નવા અને ક્રાંતિકારી અધ્યાયનો પ્રારંભ થયો છે. કેન્દ્ર સરકારે ‘સંસદીય રાજદ્વારી’  ને પ્રોત્સાહન આપવા માટે ૬૦ થી વધુ દેશો સાથે ‘સંસદીય મિત્રતા જૂથો’  ની જાહેરાત કરી છે. લોકસભાના અધ્યક્ષ ઓમ બિરલા દ્વારા સ્થાપિત આ જૂથોમાં સૌથી રસપ્રદ વાત એ છે કે, આમાં માત્ર સત્તાધારી પક્ષ જ નહીં, પરંતુ વિપક્ષના દિગ્ગજ નેતાઓ પણ નેતૃત્વ કરશે. કિરેન રિજિજુએ મંગળવારે જણાવ્યું હતું કે, વડાપ્રધાન નરેન્દ્ર મોદીના પ્રસ્તાવ મુજબ આ પહેલનો હેતુ વૈશ્વિક સ્તરે ભારતની સમાવેશી લોકશાહીનો પરિચય કરાવવાનો અને અન્ય દેશોના કાયદા નિર્માતાઓ સાથે સીધો સંવાદ સ્થાપિત કરવાનો છે.

આ મિત્રતા જૂથોમાં નેતૃત્વ કરનારા નેતાઓની યાદી જોતા સમજાય છે કે સરકાર વિદેશ નીતિને રાજકારણથી ઉપર રાખવા માંગે છે. રવિશંકર પ્રસાદ અને અનુરાગ ઠાકુર જેવા ભાજપના નેતાઓની સાથે સાથે પી. ચિદમ્બરમ (કોંગ્રેસ), અખિલેશ યાદવ (સપા), અભિષેક બેનર્જી અને અસદુદ્દીન ઓવૈસી (AIMIM) જેવા કટ્ટર વિરોધી ગણાતા નેતાઓ પણ અલગ-અલગ દેશોના મિત્રતા જૂથોનું સંચાલન કરશે. આ નેતાઓ અમેરિકા, રશિયા, જાપાન, યુનાઇટેડ કિંગડમ અને ઇઝરાયેલ જેવા ૬૪ દેશોની સંસદો સાથે સીધો સંપર્ક રાખી કાયદાકીય અનુભવો, વેપાર, ટેકનોલોજી અને સાંસ્કૃતિક આદાનપ્રદાન પર ધ્યાન કેન્દ્રિત કરશે. આ પહેલથી વૈશ્વિક મંચ પર એવો સંદેશ જશે કે રાષ્ટ્રીય હિતના મુદ્દે ભારતનો શાસક પક્ષ અને વિપક્ષ એકસાથે ઉભા છે.

પ્રથમ તબક્કામાં યુરોપિયન યુનિયન, સાઉદી અરેબિયા, બ્રાઝિલ અને સિંગાપોર જેવા વ્યૂહાત્મક ભાગીદારોનો સમાવેશ કરવામાં આવ્યો છે. આ નેટવર્કનો મુખ્ય ઉદ્દેશ્ય માત્ર બે દેશોની સરકારો વચ્ચે જ નહીં, પરંતુ બંને દેશોના જનપ્રતિનિધિઓ વચ્ચે પણ વિશ્વાસ અને સહયોગ વધારવાનો છે. ‘ઓપરેશન સિંદૂર’ ની સફળતા બાદ આ પગલાને ભારતની વધતી જતી ‘સોફ્ટ પાવર’ તરીકે જોવામાં આવે છે. ટૂંક સમયમાં આ યાદીમાં વધુ દેશો ઉમેરવામાં આવશે, જે વૈશ્વિક પડકારોનો સામનો કરવા માટે ભારતીય સંસદની ભૂમિકાને વધુ અગ્રણી બનાવશે. આ નવી રાજદ્વારી પ્રણાલીથી ભારતના આંતરરાષ્ટ્રીય સંબંધોમાં કાયમી અને મજબૂત સેતુ બનવાની આશા છે.