કેનબેરા:   ઓસ્ટ્રેલિયાની રાજધાની કેનબેરા ગઈકાલે મોડી રાત્રે એક ભયાનક સુરક્ષા કટોકટીનો સાક્ષી બની હતી. વડાપ્રધાન એન્થોની અલ્બેનીઝના સત્તાવાર નિવાસસ્થાનમાં બોમ્બ હોવાની ધમકી મળતા જ સમગ્ર પ્રશાસન હરકતમાં આવી ગયું હતું. ધમકી આપનાર વ્યક્તિએ ફોન પર દાવો કર્યો હતો કે તેણે પીએમ હાઉસમાં વિસ્ફોટકો ગોઠવી દીધા છે, જેના પગલે કિંગ્સ્ટન અને આસપાસના વિસ્તારોને તાત્કાલિક સીલ કરી દેવામાં આવ્યા હતા. પ્રોટોકોલ મુજબ, વડાપ્રધાન અલ્બેનીઝને કોઈપણ વિલંબ વગર અત્યંત કડક સુરક્ષા વચ્ચે બંકર અથવા અજ્ઞાત સુરક્ષિત સ્થળે ખસેડવામાં આવ્યા છે. બોમ્બ ડિસ્પોઝલ સ્ક્વોડ અને સ્નિફર ડોગ્સની ટીમો હાલમાં ખૂણેખૂણાની તપાસ કરી રહી છે.

આ ધમકી એવા સમયે આવી છે જ્યારે સમગ્ર ઓસ્ટ્રેલિયા કેનેડાના નવા વડાપ્રધાન માર્ક કાર્નીના આગમનની તૈયારી કરી રહ્યું છે. માર્ક કાર્ની આવતા અઠવાડિયે ઓસ્ટ્રેલિયાની મુલાકાતે આવવાના છે અને આ મહત્વપૂર્ણ મુલાકાત પહેલા પીએમ નિવાસસ્થાનને નિશાન બનાવવાની ધમકીએ સુરક્ષા એજન્સીઓના કાન ઉભા કરી દીધા છે. ઓસ્ટ્રેલિયા અને કેનેડા વચ્ચેના ઉર્જા કરાર પર હસ્તાક્ષર થવાના હોવાથી આ પ્રવાસ રાજદ્વારી રીતે ખૂબ જ સંવેદનશીલ માનવામાં આવે છે. પોલીસે આ મામલે સાયબર સેલની મદદ લઈને ધમકી આપનાર શખ્સનું લોકેશન ટ્રેસ કરવાની તજવીજ હાથ ધરી છે, જેથી આ કોઈ મજાક હતી કે ગંભીર આતંકવાદી કાવતરું તે સ્પષ્ટ થઈ શકે.

નોંધનીય છે કે અગાઉ માર્ચ ૨૦૨૫માં પણ પીએમ અલ્બેનીઝને જાનથી મારી નાખવાની ધમકી મળી હતી, જેમાં એક ૩૬ વર્ષીય માનસિક રીતે અસ્થિર વ્યક્તિની ધરપકડ કરવામાં આવી હતી. આ મહિનાની શરૂઆતમાં પીએમ નિવાસસ્થાનની નજીક હુમલાની ઘટના પણ બની હતી, જે સૂચવે છે કે ઓસ્ટ્રેલિયન વડાપ્રધાનની સુરક્ષા પર સતત જોખમ મંડરાઈ રહ્યું છે. હાલમાં કેનબેરા પોલીસે પીએમ હાઉસની આસપાસ સુરક્ષાનો લોખંડી બંદોબસ્ત ગોઠવી દીધો છે અને કોઈપણ શંકાસ્પદ હિલચાલ પર નજર રાખવામાં આવી રહી છે. પીએમ ઓફિસ તરફથી હજુ સુધી કોઈ સત્તાવાર નિવેદન બહાર પાડવામાં આવ્યું નથી, પરંતુ સમગ્ર વિશ્વ આ ઘટનાક્રમ પર નજર રાખી રહ્યું છે.